काठमाडौँ । प्रधानमन्त्री शेरबहादुर देउवालाई विश्वासको मत दिने क्रममा प्रतिपक्षी एमालेका ३३ सांसदले पार्टीको ह्वीप उल्लंघन गरेका छन् । वरिष्ठ नेता माधवकुमार नेपालले देउवालाई विश्वासको मत दिने घोषणा गरे पनि अध्यक्ष केपी ओली पक्षका ८ सांसदलेसमेत देउवाप्रति मत जाहेर गरेका छन् ।
रोचक त के भने पार्टीको ह्वीप उल्लंघन गर्दै ओली पक्षका सांसदले देउवालाई विश्वासको मत दिए । अर्कोतर्फ वरिष्ठ नेता नेपालको घोषणा विपरित नेपाल पक्षका केही सांसदले भने मत दिएनन्।
वरिष्ठ नेता नेपालसहित उहाँ पक्षधर १४ सांसदले देउवालाई विश्वासको मत दिँदा १० सांसद भने मतदानमै उपस्थित भएनन् । नेपाल पक्षकै भीम रावलले सांसद पदबाट नै राजीनामा दिनुभयो ।
एमाले सांसद को कता ?
१) देउवालाई मत दिने माधव नेपाल पक्षका १४ सांसदः माधवकुमार नेपाल, रामकुमारी झाँक्री, मेटमणि चौधरी, विरोध खतिवडा, मुकुन्द न्यौपाने, निरादेवी जैरु, सरला यादव, लक्ष्मी चौधरी, पुष्पा कर्ण, कृष्णलाल महर्जन, भवानी खापुङ, कल्याणी खड्का, सरला यादव र गोपाल बम।
२) मतदानमै सहभागी नभएका नेपाल पक्षका १० सांसदः योगेश भट्टराई, घनश्याम भुसाल, गोकर्ण विष्ट, सुरेन्द्र पाण्डे, दीपक भट्ट, सोमप्रसाद पाण्डे, यज्ञराज सुनुवार, राजबहादुर बुढा, झपट रावल र नारायण खतिवडा।
३) देउवालाई विश्वासको मत दिने ओली पक्षका ८ सांसदः प्रेम आले, हीरा केसी, पार्वती विशंखे, कलिला खातुन, समिमा हुसेन, धनबहादुर बुढा, किसान श्रेष्ठ र विनादेवी बुढाथोकी।
ह्वीप उल्लंघन गर्ने सांसदलाई के हुन्छ ?
नेकपा (एमाले) का अध्यक्ष केपी शर्मा ओलीले शेरबहादुर देउवालाई विश्वासको मत दिने सांसद एमाले रहन नसक्ने चेतावनी यसअघि नै दिइसक्नु भएको थियो । खासगरी नेपाल पक्षीय नेताहरुलाई लक्षित गर्दै देउवालाई विश्वासको मत दिए पार्टी फुटको घोषणा हुने कतिपय नेताहरूले बताउँदै आएका थिए ।
आज (सोमबार) नेकपा एमालेको केन्द्रीय कमिटी बैठक बस्दै छ। एमाले केन्द्रीय कार्यालयका सचिव शेरबहादुर तामाङका अनुसार देउवालाई विश्वासको मत दिने बेला पार्टीको ह्वीपविपरीत काम गर्ने सांसदलाई कारबाहीका विषयमा पनि बैठकमा छलफल हुनेछ।यसअनुसार एमालेको सम्भावित कारबाहीमा यी ३३ सांसद तथा नेता पर्न सक्छन् ।
यसअघि माधव नेपाल पक्षका कतिपय नेतालाई एमाले ओली पक्षले कारबाही गरिसकेको भए पनि सर्वोच्च अदालतले महाधिवेशन आयोजक कमिटीलाई अवैधानिक ठहर गरेपछि ओलीले पार्टीलाई २०७५ जेठ २ कै संरचनामा फर्काइएको घोषणा गरेकाले त्यसअघिका कारबाही स्वतः निष्क्रिय भएका थिए ।
