नवीन केसी, प्यूठान ।
प्रतिनिधिसभा सदस्य दुर्गा पौडेलले कोरोना संक्रमति बिरामीको उपचार प्रभावकारी बनाउन आग्रह गर्नुभएको छ । बुधबार कोभिड रोकथाम र उपचार व्यवस्थापनको लागि प्रदेश सांसद, जनस्वास्थ्य तथा अस्पताल प्रमुख, जनप्रतिनिधि र प्युठानका सरोकारवाला निकायका प्रमुखसँग भएको अनलाइन बैठकका क्रममा सांसद पौडेलले जनताको उपचारमा कुनै कसर बाँकी नराख्न आग्रह गर्नुभयो ।
राष्ट्रिय जनमोर्चाका उपाध्यक्ष तथा प्रवक्तासमेत रहेका पौडेलले कोभिड नियन्त्रण र उपचारमा सबै एकजुट हुनुपर्ने बताउनुभयो । अक्सिजन, औषधि, आइसोलेसनको अभाव हुन नदिन निरन्तर पहल गर्नुपर्ने बताउँदै अहिलेसम्म भएको कामको लागि सम्पूर्ण स्वास्थ्यकर्मी एवम् सरोकारवालाहरूलाई धन्यवाद दिनुभयो ।
प्यूठानको समस्याबारेमा केन्द्र सरकारसँग आफूले निरन्तर पहल गरिरहेको जानकारी गराउँदै सबैको सुझावलाई ध्यानमा राख्दै काम गर्ने बताउनुभयो । पौडेलले अक्सिजन प्लान्ट स्थापना गर्न रकम विनियोजन गरेकोमा केन्द्र सरकारलाई धन्यवाद दिनुभयो ।
बैठकमा बोल्दै प्यूठान अस्पतालका मेडिकल सुपरिटेन्डेन्ट डाक्टर नवीन दर्लामले बेड बढाउने तयारी गरिएको, सबै स्वास्थ्यकर्मीले निरन्तर काम गरेको र अक्सिजनको अभावमा कसैले पनि ज्यान गुमाउन नपरेको बताउनुभयो ।
प्रमुख जिल्ला अधिकारी खिमराज भुसालले कोभिड संकट व्यवस्थापन केन्द्रले सक्रियतापूर्वक काम गरेको बताउनुभयो । उहाँले जिल्लामा सरोकारवाला कार्यालय, जनप्रतिनिधि तथा सुरक्षा निकायले सन्तोषजनक काम गरेको बताउनुभयो ।
जिल्ला समन्वय समिति प्यूठानका प्रमुख केशवराज आचार्यले गाउँपालिका, नगरपालिका र जिल्लाका सबै निकायसँग निरन्तर समन्वय गरिएको जानकारी दिनुभयो ।
बैठकमा लुम्बिनी प्रदेशसभा सदस्य कृष्णध्वज खड्का, तारा जीसी, मल्लरानी गाउँपालिका प्रमुख अमरध्वज राना, इन्द्रध्वज बटालियनका कर्णेल अर्जुन थापा, सशस्त्र प्रहरी प्यूठानका प्रमुख योग्य बस्नेत, जिल्ला प्रहरी कार्यालयका प्रमुख सुनिल मल्ल, राष्ट्रिय अनुसन्धान प्यूठान प्रमुख करण कोइराला, अस्पताल विकास समिति अध्यक्ष सिद्धिमणि सुवेदी, जिल्ला स्वास्थ्य कार्यालय प्रमुख मधुसूदन खड्का, पत्रकार महासंघ, प्यूठानका अध्यक्ष सञ्जय रिजालले बैठकमा आफ्नो धारणा राख्नुभएको थियो ।
बैठकको सहजीकरण अखिल (छैठौं)का केन्द्रीय अध्यक्ष विमल पोखरेलले गर्नुभएको थियो । बैठक निकै महत्त्वपूर्ण भएको र कोभिड नियन्त्रण र संक्रमितको उपचारमा सबैको हातेमालो रहेकोले सफलता मिल्ने कुरामा बैठकमा सहभागी सबैको धारणा रहेको थियो ।
