खिमबहादुर विक, हैदरावाद (भारत)।
राष्ट्रिय जनमोर्चाका पूर्व महासचिव एवम् पूर्व सांसद हरि आचार्यले दिवंगत मूल प्रवाह अखिल भारत नेपाली एकता समाजका कोषाध्यक्ष रुकबहादुर केसीलाई ‘सिद्धान्तबाट कहिल्यै विचलित नहुने नेता’ को रुपमा स्मरण गर्नुभएको छ ।
मूल प्रवाह अखिल भारत नेपाली एकता समाज मध्य दक्षिण भारत क्षेत्रीय समितिले आयोजना गरेको श्रद्धाञ्जली कार्यक्रमलाई भर्चुअल माध्यमबाट सम्बोधन गर्दै नेता आचार्यले केसी जस्तोसुकै कठिन परिस्थितीमा पनि अग्रपंक्तिमा रहेर जिम्मेवारी निर्वाह गर्ने गरेको बताउनुभयो ।
‘देशभित्र चल्ने जनतान्त्रिक आन्दोलन होस् वा चुनाव, उहाँ सधैँ अग्रपंक्तिमा खटिनुहुन्थ्यो । प्रवासी नेपालीलाई परेका समस्या समाधानका लागि उहाँ जहिले र जहाँसुकै जान तयार हुनुहुन्थ्यो’ आचार्यले भन्नुभयो, ‘हामीले पार्टी र सिद्धान्तप्रति प्रतिवद्ध, विचारमा कहिल्यै नडमगाउने नेतालाई गुमाएका छौं । रुकबहादुर केसीको निधनले कम्युनिष्ट आन्दोलनलाई नै अपूरणीय क्षति पुगेको छ ।’
पूर्वमहासचिव आचार्यले त्यसक्रममा रुकबहादुर केसीका विभिन्न योगदानहरुको स्मरण गर्दै उहाँको पारिवारिक अवस्थाको बारेमा चर्चा गर्नुभएको थियो ।
मूल प्रवाह मध्य दक्षिण क्षेत्रीय समितिका अध्यक्ष रामप्रसाद पौडेलको अध्यक्षता र सचिव खिमबहादुर विकको सञ्चालनमा अघि बढेको शोक सभामा कोषाध्यक्ष तिलक रानाले स्वागत गर्नु भएको थियो।
कार्यक्रममा मूल प्रवाह अखिल भारत नेपाली एकता समाजका महासचिव ठाकुर खनालले नेता केसीको काम गर्ने शैलीको स्मरण गर्दै भारतको एउटा बैंकमा कार्यरत कर्मचारी भएर पनि उहाँ मूल प्रवाहका हरेक गतिविधिमा सक्रिय रहने गरेको बताउनुभयो । खनालले रुकबहादुर केसीलाई ‘व्यवहारमा सरल र सादगी र विचारमा प्रतिवद्ध’ नेताका रुपमा स्मरण गर्नुभयो ।
कार्यक्रममा मूल प्रवाहका केन्द्रीय सचिव प्रेम पौडेल र जनक पौडेल, केन्द्रीय सल्लाहकार कुलबहादुर थापा, केन्द्रीय सदस्य तथा पश्चिम भारत क्षेत्रीय अध्यक्ष गोविन्द थापा, केन्द्रीय सदस्य तथा सुदूरपश्चिम उत्तर क्षेत्रीय सचिव त्रिभुवन भट्टराई, केन्द्रीय सदस्य तथा पूर्वी भारत क्षेत्रीय सचिव गिरिराज परियार, मध्य दक्षिण क्षेत्रीय सदस्य रत्न सिंह कर्मा, केन्द्रीय महिला विभाग सदस्य रमकला काउछा, मध्यपश्चिम भारत क्षेत्रीय सचिवालय सदस्य श्याम तरामु, पाण्डेचरी नगर समितिका चन्द्रकान्त शर्माको आतिथ्यता रहेको थियो ।
त्यस क्रममा वक्ताहरुले रुकबहादुर केसीले देखाएको बाटोमा प्रतिवद्धताका साथ अघि बढ्न आग्रह गर्दै त्यसो भएमा मात्र उहाँप्रति सच्चा श्रद्धाञ्जली हुने विचार व्यक्र गरेका थिए ।
मूल प्रवाह अखिल भारत नेपाली एकता समाजका कोषाध्यक्ष केसीको यही वैशाख ७ गते कोरोना संक्रमणका कारण निधन भएको थियो ।
यो पनिः
मूल प्रवाहका लोकप्रिय नेता रुकबहादुर केसीको स्मरणमा ठाउँ-ठाउँमा शोकसभा
मूल प्रवाहका कोषाध्यक्ष केसीको स्मृतिमा भारतब्यापी शोकसभा
मूल प्रवाहका कोषाध्यक्ष रुकबहादुर केसीको कोरोना संक्रमणबाट निधन
