काठमाडौं । प्रधानमन्त्री केपी शर्मा ओलीले सरकार परिवर्तनको षडयन्त्र भइरहेको भन्दै प्रचण्ड-नेपाल समूहको गतिविधिलाई ‘तमासा’ को संज्ञा दिनुभएको छ । सरकार र नेत्रविक्रम चन्द (विप्लव) नेतृत्वको नेकपाबीच राष्ट्रिय सभागृहमा आयोजित हस्ताक्षर समारोहमा प्रधानमन्त्री ओलीले प्रचण्ड–नेपाल समूहप्रति लक्षित गर्दै सरकार ढाल्ने षडयन्त्रमा लागेको बताउनुभयो ।

प्रधानमन्त्री ओलीले राष्ट्रिय सभागृहमा सम्बोधन गर्दै गर्दा प्रचण्ड–नेपाल समूहले भने उहाँलाई संसदीय दलको नेताबाट हटाएको थियो । प्रचण्ड–नेपाल समूहको संसदीय दलको बैठक बसेर ओलीलाई संसदीय दलको नेताबाट हटाउनुका साथै पुष्पकमल दाहाल प्रचण्डलाई नेता चयन गरेको हो । सो समूहमा १११ जना सांसदले हस्ताक्षर गरेका र चार जनाको प्रतिवद्धता आएको बताइएको छ ।

‘उता (प्रचण्ड–नेपाल) संसदीय दलको बैठक बसेको भन्ने सुनेको छु। खोई, कुन पार्टीको हो? म संसदीय दलको नेता यहाँ छु’ ओलीले भन्नुभयो, ‘तमासा देखाएका छन् । आफ्नो दुई तिहाईको सरकार ढालेर अरुलाई लौ प्रधानमन्त्री बनिदिनुपर्यो भन्दै किस्तीमा प्रधानमन्त्री पद राखेर बाँड्दै हिँडेका छन् ।’

ओलीले सरकार ढालेपनि आफू फेरि निर्वाचनका माध्यमबाट सिंहदरबार छिर्ने बताउनुभयो ।‘सरकार त २०७३ मा पनि ढालिएको थियो । मैले भनेको थिएँ, हामी जस्केलाबाट होइन, झ्यालबाट होइन, ढोकाबाट छिर्छौैं भनेको थिएँ । निर्वाचनको माध्यमबाट सिंहदरबारको ढोकाबाट हामी सरकारमा आएका हौँ’ उहाँले थप्नुभयो, ‘फेरि पनि निर्वाचनकै माध्यमबाट आउँछौं।’

अब नेपालमा हिंसात्मक द्वन्द्व छैन
प्रधानमन्त्री ओलीले अब नेपालमा कुनै हिंसात्मक द्वन्द्व बाँकी नरहेको बताउनुभएको छ । ‘अब नेपालमा हिंसात्मक द्वन्द्व छैन, शान्ति छ। यसअघि नै अन्तर्राष्ट्रिय स्तरमा समेत नेपालको शान्तिको स्थिति राम्रो देखिएको थियो भने अबको प्यारामिटर धेरै माथि पुगेको छ, त्यसका लागि म विप्लवजीलाई धन्यवाद दिन्छु,’ दुई पक्षबीच भएको सहमति सार्वजनिक गर्ने कार्यक्रममा ओलीले भन्नुभयो, ‘उहाँले यो एउटै शाहसिक कदमबाट नेपाली जनताको मन जित्नुभएको छ । यो फोस्र्ड ल्यान्डिङ वा क्रयास ल्यान्डिङ पनि होइन, यो सेफल्यान्डिङ हो। ’

विप्लवसँग रातारात सहमति भएको होइन
प्रधानमन्त्री ओलीले विप्लव नेकपासँग रातारात सहमति नभएको प्रस्ट पार्नुभएको छ । ओलीले वर्षौदेखिको वार्ताको प्रयास अहिले आएर सफल भएको बताउनुभयो ।

‘केहीदिन अघि मैले रातारात सहमति भन्ने सुनेँ, यो रातारात भएको होइन’, प्रधानमन्त्री ओलीले भन्नुभयो, ‘वर्षौंदेखि हाम्रो वार्ता चलिरहेको थियो । वार्ता गर्दा यत्ति हो हामीले नगरा बजाएर वार्ता गरेनौँ। वार्ता वार्ता झैँ गर्यौँ ।’

उहाँले विप्लवसँग ८/१० वर्ष अगाडि भएको भेट र छलफलले अहिलेको वार्तामा विश्वासको वातावरण बनाउने काम गरेको बताउनुभयो। उहाँले त्यतिबेला केही घण्टा विप्लवसँग नेपालको राजनीतिका सन्दर्भमा कुरा गरेको बताउनुभयो ।