मेघराज रिष्मेली जापान
ब्रेन ह्यामरेज भएर उपचाररत गुल्मीको धुर्कोट पिपलधाराकी अनिता खड्कालाई जापानका नेपालीहरुले सहयोग गरेका छन् । उपचार शिलशिलामा ललितपुरको ग्वार्कोमा बस्दै आएकी अनिताको ब्रेन ह्यमरेज भएर २० महिना अगाडि अप्रेसन गरिएको थियो । त्यस यता ६-७ पटक अप्रेसन गरिसकिएको छ ।
उहाँको अहिलेसम्म उपचार जारी छ भने कति समय र खर्च लाग्ने भन्ने पनि निश्चित छैन । टाउकोमा कृत्रिम हाड्को कबर राखिएको छ भने स्वास फेर्नका लागि घाँटीमा ट्युव राखिएको छ । अब घ महिना पछि घाटिको फेरि अप्रेसन हुँदै छ ।
उहाँको घाँटीको अप्रेसनको लागि ठूलो रकम चाहिने भएको हुँदा उहाँको परिवारले सबैबाट सक्दो सहयोगको लागि आग्रह गरेको थियो ।
सोही आग्रह बमोजिम जापानलाई कर्मथलो गराउॅंदै समाजसेवा गर्दै आएका कालिका पौडेल, माया केसी, तारमणि (हरि प्रसाद) पौडेल, लक्ष्मी सापकोटा, गंगा सापकोटा, फूलमाया अर्याल, लक्ष्मी केसी, लेखबाबु थापा र युगदर्शनका जापान सम्वादाता मेघराज रिष्मेली सहितको टिमले ग्रुप मार्फत सहयोग अभियान सन्चालन गरेको थियो ।
सहयोग रकम जापान पोष्ट बैंक १०४१०–२१०२२४४१ (पौडेल तारमणी) को खातामा जम्मा गरी एकमुष्ट नेपाल पठाएर देश विदेशमा रहेका नेपालीहरूको माझ लोकप्रिय हुदै आईरहेको कार्यक्रम ईन्द्रेणी मार्फत अनिता खड्कालाई रू ३ लाख हस्तान्तरण गरिएको छ ।
यस्तै ईन्द्रेणी कार्यक्रम व्यावस्थापकको लागि ५० हजार र ईन्द्रेणी कार्यक्रम मार्फत आउने दुःखी पीडितको लागि रू. ४१ हजार १११ पठाइएको छ ।
जम्मा रकम तीन लाख ९१ हजार १८९ रूपयाँ हाल जापानदेखि नेपाल जानु भएकी लक्ष्मी सापकोटाको ग्लोबल आईएमई बैंक कलंकी काठमाडौंको खातामा पठाइएको हरीप्रसाद पौडेलले जानकारी दिनु भएको छ ।
