दोहा (कतार) । कतार नेपाली एकता समाजले बैतडीको दोगडाकेदार गाउँपालिका वडा नम्बर ७ की १७ वर्षीया बालिका भागरथी भट्टको बलात्कारपछि विभत्स हत्यामा संलग्नलाई यथाशीघ्र कार्बाही गर्न सरकारसँग जोडदार माग गरेको छ ।
समाजका अध्यक्ष विष्णु थापाक्षेत्रीद्वारा हस्ताक्षरित प्रेसवक्तव्यमा जारी यस्तो माग गरिएको हो । प्रेसवक्तव्यमा जति सक्दो चाडो घटनामा संलग्न हत्यारालाई कडा कार्बाही हुनुपर्ने बताइएको छ ।
निर्मला पन्तको बलात्कार र हत्याका अपराधीलाई दुई वर्षसम्म पनि कारबाही गर्न नसक्नुले सरकार बलात्कार र हत्याका घटनामा उदासिन रहेको देखिएको छ बताउँदै वक्तव्यमा भागरथीको पनि निर्मला पन्तको घटना जस्तै हुन सक्ने अवस्था सिर्जना नहोस्, त्यसका लागि घटनाको गम्भीर छानबिन गर्न माग गरिएको छ ।
वक्तव्यका भनिएको छ– “भागरथी भट्टका बलात्कारी र हत्यारालाई पक्राउ गरी कडा कारवाही गर्न र परिवारलाई उचित क्षतिपूर्ति दिन माग गर्दछौँ । साथै कतार नेपाली एकता समाजको तर्फबाट भागरथी भट्टप्रति हार्दिक श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गर्दछौँ ।”
