खिमराज चालिसे, चंडिगढ ।
भारत पंजावको संगरुर जिल्ला अन्तर्गत सेरेपिंड (सेरेगाउ) मा कार्यरत एक नेपाली मजदुरको मृत्यु भएपछि उनको परिवारलाई स्थानीय भारतीयले सहयोग गरेका छन् ।
अर्घाखाँचीको पाणीनी गाउँपालिका वार्ड नम्बर ३ डडुवा, तिलकेनी निवासी खडक बहादुर थापाको ४२ वर्षीय छोरा सञ्जयको ह्रदयाघातका कारण दुखद निधन भएको हो ।
नेपाली मजदुरको निधन भएपछि मानवताको परिचय दिँदै गाउँका सरपंच (अध्यक्ष) प्रकटसिंहको पहल तथा सक्रियतामा ग्रामीणवासीहरुले सहयोग गरेका हुन् ।
त्यस क्रममा मृतकको पीजीआई हस्पिटलमा लागेको करिब तीन लाख रुपैयाँको बिल मध्ये एकलाख भारु (नेरु एक लाख साठी हजार रुपैयाँ) बिल तिर्न सहयोग गरेका छन् ।
मृतकको मूल प्रवाह अखिल भारत नेपाली एकता समाज संगरूर नगर समितिका कार्यकर्ताहरुसमेतको सहभागितामा दाहसंस्कार गरिएको समितीका अध्यक्ष खिमराज पोख्रेलले जानकारी दिनुभयो ।
मृतक थापाका १२ वर्षीय छोरा तथा श्रीमती रहेका छन्।
