दाङ, असौज १९ । दाङ जिल्ला उद्योग वाणिज्य संघको आगामी निर्वाचनलाई लिएर अखिल नेपाल राष्ट्रिय उद्योग व्यापार संघले निर्वाचनमा सहभागी नहुने निर्णय गरेको छ ।
संघका अध्यक्ष रामप्रसाद पोखरेल र सदस्य शेरबहादुर पुनद्वारा जारी प्रेस विज्ञप्तिमा निर्वाचन समितिले उम्मेदवारको प्रथम नामावली प्रकाशन गर्दा खुला सदस्य र वाणिज्य सदस्यको उम्मेदवारसम्बन्धी विवाद उत्पन्न भएको उल्लेख गरिएको छ । विवादपछि निर्वाचन समितिले राजीनामा दिएर व्यवसायीहरूको भेला, साधारणसभा वा अधिवेशनबिनै नयाँ निर्वाचन समिति गठन गरी निर्वाचन प्रक्रिया अघि बढाएको भन्दै संघले आपत्ति जनाएको छ ।
विज्ञप्तिमा विद्यमान विधानअनुसार निर्वाचन गर्नुपर्ने विषयमा जिल्ला प्रशासन र अदालतबाट समेत विधानसम्मत रूपमा अघि बढ्नुपर्ने अवस्था रहेको उल्लेख गरिएको छ । तर, निर्वाचन नजिकिँदै जाँदा व्यवसायीहरू निर्वाचनको पक्षमा देखिन नसकेको संघको दाबी छ ।
उद्योग वाणिज्य संघ कुनै राजनीतिक प्रतिस्पर्धाको संस्था नभई व्यवसायीहरूको हितका लागि सर्वसम्मतिको आधारमा गठन हुनुपर्ने संस्था भएको संघले जनाएको छ । विगतमा आफूहरूले पनि सर्वसम्मतिमा जोड दिँदै आएको उल्लेख गर्दै संघले व्यवसायीहरूको चाहनाविपरीत हुन लागेको आगामी २०८३ असोज २४ गतेको निर्वाचनमा अखिल नेपाल राष्ट्रिय उद्योग व्यापार संघ सहभागी नहुने निर्णय गरेको जनाएको छ ।
संघले निर्वाचनका कारण आम उद्योगी–व्यवसायीहरू शुभचिन्तक र समस्यामा पर्न सक्ने भन्दै सम्पूर्ण उद्योगी–व्यवसायीप्रति सजग रहेको जनाएको छ । साथै, आगामी दिनमा हुने छलफल तथा सहकार्यका लागि व्यवसायीहरूबाट सहयोग र सुझावको अपेक्षा गरेको विज्ञप्तिमा उल्लेख छ ।
