काठमाडौँ । सर्वोच्च अदालतमा फेरि आगलागी भएको छ । सर्वाेच्च अदालतको निर्माणधीन भवनमा आगलागी हुँदा तीन थान कम्प्युटर जलेर नष्ट भएको हो ।

अदालतका प्रवक्ता अर्जुन कोइरालाका अनुसार, मल्टिप्लकमा विद्युत् सर्ट भएर आगलागी भएको बताउनुभएको हो ।

उनका अनुसार आगलागीबाट एउटा टेवल, कम्प्युटर जलेका छन् । मिसिलहरू भने नजलेको उनले बताए ।

आगलागीको खबर पाउनासाथ प्रहरी तथा दमकलको टोली पुगेर आगो नियन्त्रणमा लिएको थियो । सर्वोच्च अदालतमा यसअघि १७ भदौमा पनि आगलागी भएको थियो । त्यतिबेला अभिलेख शाखामा आगलागी भएको थियो ।

१७ भदौको घटनामा छानबिन चलिरहेका बेला अहिले फेरि अर्को आगलागी भएको छ । यसअघि जेनजी आन्दोलनमा समेत सर्वोच्चमा आगजनी हुँदा ठूलो क्षति भएको थियो ।