काठमाडौँ । प्रधान सेनापति अशोकराज सिग्देल चीनको साताव्यापी औपचारिक भ्रमणका लागि बेइजिङतर्फ प्रस्थान गरेका छन् । चीनको औपचारिक निमन्त्रणामा सेप्टेम्बर १३–१९ सम्मका लागि उनी चीन प्रस्थान गरेका हुन् ।
भ्रमणका क्रममा सेनापति सिग्देल बेइजिङमा आयोजना हुने तेह्रौँ बेइजिङ सियाङसान फोरममा समेत सहभागी हुने कार्यक्रम रहेको छ ।
नेपाली सेनाका अनुसार यस भ्रमणले नेपाल र चीनबिचको आपसी सैनिक सम्बन्धलाई थप विस्तार गर्नुका साथै सैनिक कूटनीतिमार्फत नेपालको समग्र परराष्ट्रनीतिलाई टेवा पुर्याउन महत्त्वपूर्ण योगदान दिने विश्वास लिइएको छ ।
बेइजिङ प्रस्थान गर्नुअघि प्रधान सेनापति सिग्देललाई जङ्गी अड्डामा नेपाली सेनाको एक टुकडीले सम्मान गारत अर्पण गरेको थियो । त्यसपछि उनलाई त्रिभुवन अन्तर्राष्ट्रिय विमानस्थलमा बलाधीकृत रथी प्रदीपजङ्ग केसीले बिदाइ गरेका थिए ।
प्रधान सेनापतिको भ्रमण अवधिभर उनको अनुपस्थितिमा बलाधिकृत रथी केसीले कायममुकायम प्रधान सेनापतिको कार्यभार सम्हाल्ने सेनाले जनाएको छ ।
