काठमाडौँ । सरकारले काठमाडौँ उपत्यकाका नदीकिनाराबाट हटाई विभिन्न होल्डिङ सेन्टरमा बसिरहेका सुकुमबासीलाई भनेको छ– ‘आआफ्नो गृहजिल्ला फर्किनू ।’
अहिले होल्डिङ सेन्टरमा बसिरहेका विभिन्न जिल्लाका २९ जना सुकुम्वासी परिवारलाई भूमि समस्या समाधान समितिले सो परिपत्र गरेको हो ।
समितिले एक सूचना जारी गर्दै अधिकारसम्पन्न बागमती सभ्यता एकीकृत विकास समितिले सङ्कलन गरेको डिजिटल विवरणका आधारमा पहिचान भएका २९ परिवारलाई जग्गा व्यवस्थापनका लागि सम्पर्क गर्न भनिएको छ ।
भूमिव्यवस्था, सहकारी, सङ्घीय मामिला तथा सामान्य प्रशासन मन्त्रालयको निर्णयअनुसार ती परिवारको नेपालभर कतै पनि घरजग्गा रहे/नरहेको भनी भूमि व्यवस्थापन तथा अभिलेख विभागमार्फत जाँचबुझ गरिएको थियो । विभागले ती परिवारको नाममा कुनै पनि जग्गा फेला नपरेको प्रतिवेदन दिएपछि समितिले उनीहरूको स्थायी ठेगाना भएका सम्बन्धित जिल्लामा जग्गा उपलब्ध गराउन सिफारिस गरेको हो ।
उनीहरूको डिजिटल विवरण, आवेदन फारम र संलग्न कागजातसहितको फाइल सम्बन्धित जिल्ला समितिमा पठाइसकेको समितिले जनाएको छ ।
सूचनामा विभिन्न होल्डिङ सेन्टरमा बसिरहेका २९ जनाको नामावली सार्वजनिक गरिएको छ । सूचीमा सिन्धुली, सर्लाही, काठमाडौँ, सुनसरी, धनकुटा, मोरङ, सिन्धुपाल्चोक, महोत्तरी, झापा, भोजपुरलगायतका जिल्ला स्थायी ठेगाना भएका परिवार छन् ।
हाल उनीहरू सिन्धुपाल्चोकको बनेपास्थित रेडक्रस तालिम केन्द्र, काठमाडौँ कीर्तिपुरस्थित राधास्वामी सत्सङ्ग, भक्तपुरको नगरकोटस्थित खानेपानी तालिम केन्द्र र भक्तपुरकै बोडेस्थित कृषि तालिम केन्द्रमा बसोबास गरिरहेका छन् ।
