काठमाडौँ, ५ साउन । भक्तपुरमा जन्मदिनको पार्टीका क्रममा भएको कुटाकुटमा गम्भीर घाइते भएका एक जनाको उपचारका क्रममा मृत्यु भएको छ।
मृत्यु हुनेमा बर्दिया स्थायी घर भई हाल भक्तपुरको सल्लाघारी बस्दै आएका राज कार्की रहेका छन्। जिल्ला प्रहरी परिसर भक्तपुरका प्रवक्ता प्रहरी नायब उपरीक्षक (डीएसपी) दीपककुमार कार्कीका अनुसार आइतबार राति घ्याम्पेडाँडामा आयोजना गरिएको जन्मदिनको पार्टीमा खानपिनका क्रममा सहभागीहरूबीच विवाद भएको थियो।
विवाद उग्र बन्दै गएपछि भएको कुटाकुटमा कार्की गम्भीर घाइते भएका थिए। उपचारका क्रममा मंगलबार उनको मृत्यु भएको प्रहरीले जनाएको छ।
घटनामा संलग्न भएको आशंकामा घटनास्थलमा रहेका करिब ३० जनालाई प्रहरीले नियन्त्रणमा लिएर सोधपुछ गरिरहेको छ। घटनाको थप अनुसन्धान जारी रहेको प्रहरीले जनाएको छ।
मृतक कार्कीको शव पोस्टमार्टमका लागि दुवाकोट अस्पतालमा राखिएको छ।
