नेपालगञ्ज, बाँके। खजुरा गाउँपालिकाको आर्थिक वर्ष २०८२/०८३ को तेस्रो चौमासिक सार्वजनिक सुनुवाइ कार्यक्रम सम्पन्न भएको छ। गाउँपालिकाको आयोजना तथा बास नेपालको सहजीकरणमा असार ३१ गते सम्पन्न कार्यक्रममा नागरिकका गुनासा, सुझाव र प्रश्नमाथि छलफल गर्दै ९ बुँदे साझा सार्वजनिक प्रतिबद्धता घोषणा गरिएको हो।
सार्वजनिक सुनुवाइमा सहभागीहरूले जनप्रतिनिधिको न्यून उपस्थिति, विद्यालयमा सुरक्षित खानेपानी, फर्निचर तथा अतिरिक्त क्रियाकलापका लागि बजेट अभाव, वडा नं. २ को बावाधाममा शौचालय निर्माण, सीपमूलक तालिमको प्रभावकारिता, सार्वजनिक सडक अतिक्रमण, शैक्षिक गुणस्तर सुधार, फोहोरमैला व्यवस्थापन, जलवायु परिवर्तन, प्लास्टिकजन्य प्रदूषण, ट्राफिक व्यवस्थापन तथा लागूऔषध दुर्व्यसन नियन्त्रणलगायत विषयमा प्रश्न तथा गुनासा राखेका थिए। साथै केही विद्यालयले कानुनविपरीत शुल्क असुलिरहेको भन्दै आवश्यक कारबाहीको मागसमेत गरिएको थियो।
सहभागीहरूको जिज्ञासाको गाउँपालिका अध्यक्ष डम्बर बिक, उपाध्यक्ष मञ्जु मल्ल, सम्बन्धित वडा अध्यक्ष तथा शाखा प्रमुखहरूले जवाफ दिएका थिए।
सुनुवाइको निष्कर्षस्वरूप सार्वजनिक सरोकारका कार्यक्रममा जनप्रतिनिधिको अनिवार्य उपस्थिति सुनिश्चित गर्ने, विद्यालयमा खानेपानी र फर्निचर व्यवस्थापन गर्ने, अतिरिक्त क्रियाकलापमा सहयोग गर्ने, बावाधाममा शौचालय निर्माणका लागि पहल गर्ने, सीपमूलक तालिमलाई रोजगारीसँग जोड्ने, सार्वजनिक सडक अतिक्रमण हटाउने, शैक्षिक गुणस्तर सुधारका कार्यक्रम सञ्चालन गर्ने, फोहोरमैला व्यवस्थापन र प्लास्टिक न्यूनीकरणका लागि आवश्यक नीति कार्यान्वयन गर्ने, कानुनविपरीत शुल्क लिने विद्यालयमाथि कारबाही गर्ने, जनता माध्यमिक विद्यालय नजिकको अव्यवस्थित विद्युत् पोल र तार साउन ५ भित्र व्यवस्थापन गर्ने, ट्राफिक व्यवस्थापन सुदृढ गर्ने तथा लागूऔषध दुर्व्यसनविरुद्ध सचेतनामूलक अभियान सञ्चालन गर्ने प्रतिबद्धता व्यक्त गरिएको छ।
कार्यक्रममा बास नेपालका कार्यक्रम अधिकृत रबिन्द्र बोहराले सहजीकरण गरेका थिए। बास नेपालका केन्द्रीय अध्यक्ष शिवकुमार वर्माले स्वागत तथा कार्यक्रमको उद्देश्य प्रस्तुत गरेका थिए भने जनसम्पर्क अधिकृत माधव काकीले नागरिक प्रतिवेदनपत्र र बहिर्गमन अभिमतको नतिजा सार्वजनिक गरेका थिए। गाउँपालिकाका प्रमुख प्रशासकीय अधिकृत दिलबहादुर पौडेलले आर्थिक वर्षभरि सञ्चालन भएका योजना तथा कार्यक्रमहरूको प्रगति प्रतिवेदन प्रस्तुत गरेका थिए।
