काठमाडौँ । नेपाल खेलकुद पत्रकार मञ्च (एनएसजेफ) ले विश्व खेलकुद पत्रकार दिवसको उपलक्ष्यमा २०८३ असार १८ गते बिहीबार नेपाल इन एसियन गेम्स रोड टु आइची–नागोया संवाद कार्यक्रम आयोजना गरेको छ ।
सो अवसरमा राष्ट्रिय खेलकुद परिषद् (राखेप) का सदस्यसचिव रामचरित्र मेहताले एसियाली खेलकुदमा स्वर्ण पदकसहित दोहरो अङ्कमा पदक जित्ने सरकारको लक्ष्य पूरा गर्न आफूहरू लागिपरेको र अब आगामी महिनादेखि खेलाडीलाई वैदेशिक प्रशिक्षणमा पठाउने तयारी भइरहेको बताए ।
नेपाल ओलम्पिक कमिटी (एनओसी) का अध्यक्ष जीवनराम श्रेष्ठले राखेपले एसिायडको तयारी उल्लेखनीय रूपमा गरिरहेको बताए ।
हाङझाव एसियाडमा ऐतिहासिक रजत पदक विजेता कराँते खेलाडी एरिका गुरुङले एसियाडमा रजत पदक जितेर आएपछि नै राखेपले मिसन–२०२६ अन्तर्गत विशेष प्रशिक्षण राखेपछि अहिले खेलाडीले ३६५ दिन नै राम्रो प्रशिक्षण गर्ने अवसर पाएकाले आफूले मात्र नभई अन्य खेलाडीले आइची–नागोया एसियाडमा अझ राम्रो गर्ने विश्वास व्यक्त गरे ।
नेपाल खेलकुद पत्रकार मञ्चका अध्यक्ष निरञ्जन अधिकारीले एक सय वर्ष अघि एआइपिएसको गठन हुँदाको दिन जुलाई २ लाई नै विश्व खेलकुद पत्रकार दिवसको रुपमा मनाउँदै आएको जानकारी दिए ।
संवाद कार्यक्रमको सहजकर्ता एआइपिएसका कोषाध्यक्ष निरञ्जन राजवंशीले गरेका थिए ।
एरिका सम्मानित
तारकेश्वर नगरपालिकाले कराते खेलाडी एरिका गुरुङलाई बिहीबार नै नगदसहित सम्मान गरेको छ । इन्डोनेसियामा भएको बाइसौा सिनियर एसियाली करातेमा कास्य जितेकोमा एरिकालाई २५ हजार नगदसहित सम्मान गरिएको हो ।
सोही अवसरमा करातेका सन्तोष श्रेष्ठ, उसुका राजीव तामाङ र मुकेश पण्डितलाई जनही १० हजार नगदसहित सम्मान गरिएको थियो ।
राष्ट्रपति रनिङ शिल्डमा पदक जित्ने नगरका खेलाडी पनि नगदसहित सम्मानित भए । उनीहरूलाई तारकेश्वर नगरपालिकाका मेयर कृष्णहरि महर्जन, उपमेयर सिर्जना बुर्लाकोटी अर्याल, तारकेश्वर नगर खेलकुद विकास समितिका अध्यक्ष विक्रम खड्गीलगायतले एक कार्यक्रमबिच सम्मान गरेका हुन् ।
