काठमाडौं, असार १६ । १६औँ दक्षिण एसियाली शारीरिक सुगठन तथा फिजिक स्पोर्ट्स च्याम्पियनसिपमा सहभागी हुन ७ खेलाडीसहित ९ सदस्यीय नेपाली टोली मंगलबार भुटानको थिम्पु जाने भएको छ। असार १६ देखि २० गतेसम्म हुने प्रतियोगितामा ५ पुरुष र २ महिला खेलाडीले नेपालको चुनौती प्रस्तुत गर्नेछन्।
टोलीमा सगेन्द्र सिंह, दीपजंग रोका मगर, सागर श्रेष्ठ, आकाश श्रेष्ठ, पुकार शाक्य, विनु जिटी र सीता खत्री रहेका छन्। टोलीलाई राष्ट्रिय खेलकुद परिषद्का उपाध्यक्ष विशाल श्रेष्ठले सोमबार बिदाइ गरेका छन्। नेपालले प्रतियोगितामा हालसम्म १२ स्वर्ण, १६ रजत र १९ कांस्य पदक जितेको छ।
प्रथम कागेश्वरी मनोहरा नगरस्तरीय तेक्वान्दो प्रतियोगिताको उपाधि यान्सुब तेक्वान्दो डोजाङले जितेको छ। यान्सुबले १५ स्वर्ण, ८ रजत र १० कांस्य पदकसहित टिम च्याम्पियन बन्दै उपाधि हात पार्यो।
चन्द्र सूर्य तेक्वान्दो डोजाङ दोस्रो तथा थली तेक्वान्दो डोजाङ तेस्रो भयो। प्रतियोगितामा भिजन तामाङ, पेमा गुरुङ, प्रिन्सकुमार राम र रेन्जिङ चौलागाईं उत्कृष्ट खेलाडी घोषित भए। थलीस्थित कागेश्वरी मनोहरा नगरपालिकाको परिसरमा सम्पन्न एकदिने प्रतियोगितामा २५५ खेलाडीले ४५ स्पर्धामा प्रतिस्पर्धा गरेका थिए।
