काठमाडौँ : नेपाली कांग्रेसभित्र संस्थापन र इतर पक्षबीच पार्टी एकताका लागि भइरहेको संवाद पछिल्लो समय ठप्प भएको छ। सहमतिका लागि भएको पछिल्लो छलफलपछि दुवै पक्षबीच औपचारिक संवाद हुन नसकेको नेताहरूले बताएका छन्।
सभापति गगन थापाले पार्टी एकताका लागि विभिन्न प्रस्ताव अघि सारे पनि त्यसमा ठोस सहमति जुट्न सकेको छैन। इतर पक्षले क्रियाशील सदस्यता, कार्यसमिति समायोजन तथा महाधिवेशनसम्बन्धी विषयमा आफ्ना सर्तहरू राखेको छ।
सहमति नजुटेपछि इतर पक्षले सातै प्रदेशमा भेला आयोजना गर्दै राष्ट्रिय भेला बोलाएर १५औँ महाधिवेशनको छुट्टै तयारी गर्ने चेतावनी दिएको छ। नेता विमलेन्द्र निधिले जेठ मसान्तपछि एकताका लागि अनन्तकालसम्म प्रतीक्षा नगर्ने बताएका छन्।
यद्यपि, कोइराला पक्षका केही नेताले भने अझै पनि पार्टी एकताकै पक्षमा रहेको जनाउँदै सहमतिका लागि दबाब बढाउने रणनीति अपनाइएको बताएका छन्।
संस्थापन पक्षका नेताहरूले भने संवाद जारी रहेको र कांग्रेसमा दुईवटा महाधिवेशन हुने अवस्था नआउने दाबी गरेका छन्।
