गण्डकी, ३० जेठ । गण्डकी प्रदेशसभाको शुक्रबार बसेको बैठकमा प्रदेश लोकसेवा आयोग र प्रदेशसभाको सार्वजनिक लेखा समितिको वार्षिक प्रतिवेदन पेश गरिएको छ।

बैठकमा मुख्यमन्त्री सुरेन्द्रराज पाण्डेले प्रदेश लोकसेवा आयोग, गण्डकी प्रदेशको आर्थिक वर्ष २०८१/८२ को वार्षिक प्रतिवेदन प्रदेशसभामा पेश गर्नुभयो। उक्त प्रतिवेदनलाई थप अध्ययन तथा छलफलका लागि सम्बन्धित समितिमा पठाइएको सभामुख कृष्णप्रसाद धितालले जानकारी दिनुभयो।

त्यसैगरी, प्रदेशसभाको सार्वजनिक लेखा समितिको वार्षिक प्रतिवेदन समितिका सभापति सुधिरकुमार पौडेलले बैठकमा प्रस्तुत गर्नुभयो।

शुक्रबारको बैठकमा कृषि, भूमि व्यवस्था तथा सहकारीमन्त्री भीमबहादुर कार्कीले प्रदेशसभा सदस्यहरूले उठाएका आफ्नो मन्त्रालयसँग सम्बन्धित विभिन्न प्रश्नहरूको जवाफ दिनुभएको थियो।

प्रदेशसभा सचिवालयका अनुसार गण्डकी प्रदेशसभाको अर्को बैठक असार १ गते अपराह्न ४ बजे बस्नेछ।