काठमाडौँ । सामाजिक अभियन्ता तथा राजनीतिक क्षेत्रमा सक्रिय रहँदै आएकी छिरिङ ल्हामु लामाले आफ्नो राजनीतिक यात्रा अन्त्य गर्ने घोषणा गरेकी छन्।
सामाजिक सञ्जाल फेसबुकमार्फत लामो वक्तव्य जारी गर्दै उनले आफ्नो अस्तित्व, क्षमता र योगदानलाई स्वीकार गर्न नसक्ने प्रवृत्ति तथा पटक–पटक भोग्नुपरेको अपमानजनक व्यवहारका कारण उक्त निर्णय लिन बाध्य भएको बताएकी छन्।
लामाले आफूले विचार, अभियान र जिम्मेवारीलाई केन्द्रमा राखेर निरन्तर काम गरे पनि विभिन्न अवसरमा अविश्वास, उपेक्षा र सम्बन्धको नाममा हुने दुरुपयोगको सामना गर्नुपरेको उल्लेख गरेकी छन्। उनले आफूले प्राप्त गरेका जिम्मेवारीहरू इमानदारितापूर्वक पूरा गरे पनि अपेक्षित सम्मान र सहयोग नपाएको गुनासो व्यक्त गरेकी छन्।
वक्तव्यमा उनले कुनै पद, अवसर वा लाभका लागि नभई आत्मसम्मान र स्वाभिमानको रक्षाका लागि आफूले यो निर्णय गरेको स्पष्ट पारेकी छन्। “जहाँ विचार, योगदान र समर्पणको कदर हुँदैन, त्यहाँ बसिरहनुभन्दा आफ्नो बाटो रोज्नु नै सही निर्णय हो,” उनले उल्लेख गरेकी छन्।
लामाले आफ्नो यात्रामा साथ, विश्वास र हौसला प्रदान गर्ने सबैप्रति आभार व्यक्त गर्दै आगामी दिनमा पनि स्वतन्त्र रूपमा समाज र मानवीय मूल्यका पक्षमा आवाज उठाइरहने प्रतिबद्धता जनाएकी छन्।
उनले आफू कुनै कमजोरी वा हारका कारण पछि नहटेको भन्दै अब आफ्नो आत्मसम्मान, विवेक र स्वतन्त्र चेतनालाई केन्द्रमा राखेर नयाँ यात्रामा अघि बढ्ने बताएकी छन्।
लामा अघिल्लो कार्यकालमा तत्कालीन नेकपा (माओवादी केन्द्र) बाट समानुपातिक सांसद बनेकी थिइन् ।
