पोखरा । आगामी आर्थिक वर्षको बजेट सार्वजनिक भएपछि कास्की निर्वाचन क्षेत्र नम्बर–३ की प्रतिनिधिसभा सदस्य बिना गुरुङमाथि आफ्नै क्षेत्रका वडाध्यक्ष र पार्टी कार्यकर्ताले योजनाबारे जवाफ माग्न थालेका छन्।
माछापुच्छ्रे गाउँपालिका–८ र ९ का वडाध्यक्षहरूले औपचारिक पत्र लेख्दै सङ्घीय बजेटमा आफ्नो वडाका कुन–कुन योजना समावेश भए भन्ने विवरण उपलब्ध गराउन आग्रह गरेका छन्। सङ्घीय योजनाबारे जानकारी नहुँदा स्थानीय तहको बजेट निर्माणमा दोहोरोपना र अन्योल सिर्जना हुने उनीहरूको भनाइ छ।
यसअघि वडाहरूले दर्जनौं योजनाका लागि बजेट माग पठाए पनि अधिकांश योजना बजेटमा नपरेको जनाइएको छ। यस विषयमा सांसद गुरुङलाई आफ्नै पार्टीका नेता–कार्यकर्ताले समेत जनतासँग संवादको कमी भएको भन्दै आलोचना गरेका छन्।
बढ्दो प्रश्न र गुनासोबीच सांसद गुरुङले सामाजिक सञ्जालमार्फत कास्कीका पाँच पालिकाले पाएको अन्तरसरकारी वित्तीय हस्तान्तरणको विवरण सार्वजनिक गर्दै सीमित स्रोतसाधनका कारण सबै योजनाले बजेट नपाउने स्पष्ट पारेकी छन्। उनले आवश्यक योजनाका लागि आगामी वर्ष पुनः पहल गर्ने प्रतिबद्धता पनि व्यक्त गरेकी छन्।
स्थानीय तहका जनप्रतिनिधिबाटै बजेटबारे प्रश्न उठ्न थालेपछि सांसद र जनप्रतिनिधिबीच समन्वय तथा पारदर्शिताको विषय फेरि चर्चामा आएको छ।
