काठमाडौं, २७ जेठ । राष्ट्रिय स्वतन्त्र पार्टी (रास्वपा) को बागमती प्रदेश अधिवेशनमा सहभागी करिब चार सय प्रतिनिधिविरुद्ध उजुरी परेपछि निर्वाचन प्रक्रिया स्थगित भएको छ।
पार्टी समायोजन प्रक्रियामार्फत आएका सदस्यबाट चयन भएका प्रतिनिधिहरूमाथि उजुरी परेपछि विवाद समाधान गर्न मतदान प्रक्रिया रोकिएको निर्वाचन समितिले जनाएको छ। बुधबार बिहान मतदान गर्ने कार्यतालिका रहे पनि मतपत्रमा देखिएको त्रुटि, प्रतिनिधिसम्बन्धी विवाद तथा व्यवस्थापकीय तयारीका कारण निर्वाचन स्थगित गरिएको हो।
अधिवेशनका लागि १,३०० भन्दा बढी प्रतिनिधि छनोट भएका छन्। आवश्यक प्राविधिक र व्यवस्थापकीय काम सम्पन्न भएपछि मतदानको मिति कम्तीमा २४ घण्टा अगावै सार्वजनिक गरिने निर्वाचन समितिले जनाएको छ।
रास्वपाको पहिलो बागमती प्रदेश अधिवेशनमा सभापति पदका लागि अच्युत्तम लामिछाने, उत्सव अर्याल, कृष्णमान श्रेष्ठ र हरिबहादुर क्षेत्रीले उम्मेदवारी दिएका छन्। पार्टी विधानअनुसार बागमती प्रदेश समितिमा ६५ सदस्य रहने व्यवस्था छ।
