काठमाडौं । प्रतिनिधि सभाको आजको बैठकमा प्रमुख प्रतिपक्षी दल नेपाली कांग्रेसका सांसदहरूले सभामुखको अनुमति नलिई आफ्नै पहलमा पाँच मिनेट मौनधारण गरेपछि संसद्भित्र नयाँ बहस र तरंग सिर्जना भएको छ।
बैठक सञ्चालन भइरहेका बेला कांग्रेस सांसद निष्कल राईले आकस्मिक रूपमा शहीदहरूको सम्मानमा पाँच मिनेट मौनधारण गर्न प्रस्ताव गरेका थिए। उनको आह्वानलगत्तै विपक्षी दलका अन्य सांसदहरू पनि आ–आफ्नो आसनबाट उठेर मौनधारणमा सहभागी बनेका थिए।
तर, कार्यसूचीमा समावेश नभएको र सभामुखको पूर्वस्वीकृति समेत नलिइएको उक्त कदमप्रति सभामुख डीपी अर्यालले कडा असन्तुष्टि व्यक्त गरेका छन्। उनले संसद्का सबै गतिविधि निर्धारित कार्यसूची, नियम र संसदीय प्रक्रियाअनुसार सञ्चालन हुनुपर्ने उल्लेख गर्दै स्वेच्छाले गरिएको मौनधारणले संसदीय मर्यादा र अनुशासनमाथि प्रश्न उठाएको बताए।
सभामुख अर्यालले सांसदहरूको यस्तो व्यवहारले सदनको गरिमा र संस्थागत प्रक्रियाको सम्मानमा असर पुग्न सक्ने टिप्पणी गरे। उनका अनुसार संसद् सार्वभौम संस्था भएकाले यहाँका प्रत्येक गतिविधि स्थापित नियम र परम्पराको दायराभित्रै हुन आवश्यक छ।
विपक्षी सांसदहरूले भने शहीदप्रति सम्मान व्यक्त गर्ने उद्देश्यले मौनधारण गरिएको बताएका छन्। यद्यपि, अनुमति बिना गरिएको उक्त कदमले संसदीय अभ्यास, अधिकार र प्रक्रियाबारे नयाँ बहस जन्माएको छ।
यस घटनापछि संसद्भित्र नियमको पालना र सांसदहरूको अभिव्यक्ति स्वतन्त्रताबीचको सन्तुलनबारे चर्चा चुलिएको छ।
