काठमाडौँ, २६ जेठ । राष्ट्रिय स्वतन्त्र पार्टी (रास्वपा) यतिबेला देशव्यापी जिल्ला अधिवेशनको अभियानमा छ । पार्टी नेतृत्वले यसलाई संगठन विस्तार, लोकतान्त्रिक अभ्यास र आगामी निर्वाचनको तयारीका रूपमा प्रस्तुत गर्ने कोशिस गरिरहेको छ । तर अधिवेशनसँगै सतहमा आएका आन्तरिक विवाद, गुटगत प्रतिस्पर्धा र नेतृत्व केन्द्रीत असन्तुष्टिले पार्टीभित्रको आन्तरिक विवाद चुलिन थालेका छन् ।
पछिल्लो समय विभिन्न जिल्लामा सम्पन्न अधिवेशनका क्रममा उम्मेदवारी विवाद, नेतृत्व चयनमा असहमति, सामाजिक सञ्जालमार्फत सार्वजनिक आरोप–प्रत्यारोप तथा संगठनभित्र देखिएको अराजनैतिक गतिविधीले रास्वपाको आन्तरिक राजनीतिक कमजोर रहेको उजागर गरेको राजनीतिक विश्लेषकहरूको भनाइ छ।
वि.सं. २०७९ को प्रतिनिधिसभा निर्वाचनमा अप्रत्याशित सफलता हासिल गर्दै राष्ट्रिय राजनीतिमा उदाएको रास्वपाले भ्रष्टाचारविरुद्धको अभियान, वैकल्पिक राजनीतिको नारा तथा युवा पुस्ताको आकर्षणका कारण उल्लेखनीय जनसमर्थन प्राप्त गरेको थियो । तर त्यसयता पार्टीले भोगेका विवाद, नेतृत्वमाथि लागेका आरोप, सरकारमा सहभागिता र बाहिरिने क्रम तथा संगठन निर्माणमा देखिएका कमजोरीहरूले प्रारम्भिक उत्साहलाई क्रमशः कमजोर बनाउँदै गएको विश्लेषण हुन थालेको छ।
राजनीतिक विश्लेषकहरूका अनुसार आन्दोलन वा असन्तुष्टिको लहरमा उदाएका दलहरूका लागि चुनावी सफलता जोगाउन हम्महम्मे परिरहेको छ । रास्वपाले अहिले त्यही चुनौतीको सामना गरिरहेको देखिन्छ । जिल्ला अधिवेशनलाई संगठन निर्माणको अवसरका रूपमा लिइएता पनि कतिपय स्थानमा देखिएका विवादले पार्टीको आन्तरिक लोकतन्त्रभन्दा व्यवस्थापन संकटलाई बढी उजागर गरेको टिप्पणी हुन थालेको छ।
पछिल्ला केही उपनिर्वाचन, स्थानीय राजनीतिक गतिविधि तथा सार्वजनिक बहसहरूमा रास्वपाप्रति प्रारम्भिक चरणमा देखिएको आकर्षण केही खुम्चिएको संकेत देखिएको राजनीतिक वृत्तमा चर्चा छ । पार्टीले उठाएका मुद्दाप्रति जनस्तरमा शंका आशंका उत्पन्न हुनथालिरहेको छ । नेतृत्वको कार्यशैली, संगठनात्मक अनुशासन र दीर्घकालीन राजनीतिक दृष्टिकोणबारे समेत प्रश्न उठ्ने क्रम बढेको छ।
