काठमाडौँ । नेकपा (मसाल) का महामन्त्री मोहनविक्रम सिंहले आगामी फागुन २१ गते हुन गइरहेको प्रतिनिधिसभाको चुनाव अमेरिकी साम्राज्यवाद र देशभक्त नेपालीमाझ हुन गइरहेको बताउनुभएको छ ।
२०८२ फागुन ३ गते आइतबार साँझ अखिल नेपाल प्रगतिशील लेखक सङ्घ (अन्पा) द्वारा आयोजित “गिलासमा भोट हालौँ” शीर्षकको अडियो गीतको भर्चुअल विमोचन कार्यक्रममा मन्तव्य राख्दै उहाँले सो धारणा राख्नुभएको हो ।
‘पहिलेपहिलेका चुनाव नेपालका राजनीतिक पार्टीमाझ हुने गर्दथे’ महामन्त्री सिंहले भन्नुभयो– ‘तर अहिलेको परिस्थिति फरक छ । अहिलेको चुनाव देशभक्त नेपाली जनता र अमेरिकी साम्राज्यवादको माझमा हुन गइरहेको छ ।’
उहाँले यो चुनावमार्फत अमेरिकी साम्राज्यवादलाई पराजित गर्नुपर्ने दायित्व देशभक्त नेपाली जनतामा आएको पनि स्पष्ट पार्नुभयो ।
डोनाल्ड ट्रम्प पुन: राष्ट्रपतिमा निर्वाचित भएपछि अमेरिकाले विश्वभरि नै आधिपत्य कब्जा जमाउन खोजिरहेको उहाँले बताउनुभयो ।
‘हामीले देखिरहेका छौँ, अमेरिकाले ग्रिनल्यान्ड, क्यानडा, पनामा, गाजापट्टीजस्ता देशमा कब्जा जमाउन खोजिरहेको छ’ सिंहले भन्नुभयो ।
अमेरिका चीनका विरुद्ध नेपाललाई पनि कब्जा गर्ने रणनीतिमा रहेको उहाँले बताउनुभयो ।
सङ्क्षिप्त मन्तव्यको क्रममा उहाँले बाहिरबाट शक्तिशालीजस्तो देखिए पनि आन्तरिक रूपमा अमेरिका कमजोर बन्दै गएको उहाँले बताउनुभयो ।
‘बाहिरबाट अमेरिका बलियोजस्तो देखिए पनि भित्रभित्रै कमजोर हुँदै गइरहेको छ’ उहाँले अगाडि भन्नुभयो– ‘डेनमार्क, क्यानडा, युरोप, रुस, चीन, इरान, भारतजस्ता साम्राज्यवादी देशहरू नै अमेरिका विरुद्ध उभिएका छन् ।’
महामन्त्री सिंहले विश्वका शान्तिप्रेमी जनताको बलबाट अमेरिकी साम्राज्यवादलाई पराजित गर्न सकिने धारणा राख्नुभयो ।
फरक प्रसङ्गमा उहाँले नेपालमा भ्रष्टाचार गम्भीर समस्याको रूपमा रहेको बताउनुभयो ।
‘नेपालमा भ्रष्टाचार गम्भीर समस्या भएको छ’ उहाँले भन्नुभयो– ‘तर भ्रष्टाचारबाट बचेको, त्यसको विरुद्ध सङ्घर्ष गर्दै आइरहेको नेपालमा एउटा पार्टी छ । त्यो हो राष्ट्रिय जनमोर्चा । त्यसको चुनाव चिह्न गिलासमा मतदान गर्न म नेपाली जनतासित अपिल गर्दछु ।’
उहाँले चित्रबहादुर केसीजस्तो निष्कलङ्क नेताको नेतृत्वमा रहेको राजमोलाई जिताएर मात्रै नेपालको विकास हुने धारणासमेत राख्नुभयो ।
विदेशमा रहेका नेपालीमाझ रास्वपाले प्रशस्त भ्रम दिएको सन्दर्भ जोड्दै उहाँले आमचुनावमा राजमोको पक्षमा प्रचार गर्नुपर्ने आवश्यकतामा जोड दिनुभयो ।
