काठमाडौँ । मिडियामाथि अदालतको अङ्कुश संविधान, कानुन र अन्तर्राष्ट्रिय मूल्यमान्यता विपरीत भएको भन्दै पत्रकार सङ्गठनहरू आक्रोशित भएका छन् ।
२०८२ जेठ २९ गते शुक्रबार राजधानीको संवाद डबलीले आयोजना गरेको “प्रेस स्वतन्त्रतामाथि अदालतको ठाडो हस्तक्षेप र निकास” विषयक अन्तर्क्रियामा पत्रकार सङ्गठनका नेताहरूले सडक आन्दोलन गर्ने चेतावनीसमेत दिएका हुन् ।
कार्यक्रममा मन्तव्य राख्दै प्रगतिशील पत्रकार सङ्घका केन्द्रीय सल्लाहकार तथा नेपाल पत्रकार महासङ्घ उपत्यका प्रदेश समितिका सदस्य वैरागी जेठाले अदालतको गलत रवैयाले प्रेस स्वतन्त्रता कुण्ठित भएको बताउनुभयो ।
उहाँले प्रेस स्वतन्त्रता कुण्ठित हुँदै जाँदा त्यसका विरुद्ध आन्दोलन गर्नुपर्ने अवस्था आएको धारणा राख्नुभयो ।
नेपाल प्रेस युनियनका अध्यक्ष कमल गिरीले मन्तव्य राख्दै प्रेस स्वतन्त्रता विरुद्ध पत्रकारहरू चुप नबस्ने अभिव्यक्ति दिनुभयो ।
नेपाल प्रेस युनियनका महासचिव दिलिप पौडेलले पत्रकार दिलभूषण पाठक विरुद्ध आदालतले पक्राउ पूर्जी जारी गरिनु र अनलाइन सञ्चारमाध्यमलाई समाचार हटाउन लगाउनु संविधन विपरीत भएको धारणा राख्नुभयो ।
पत्रकार महासङ्घका केन्द्रीय सदस्य सूर्य सुवेदीले सरकार र अदालतको मिलेमतोमा पत्रकार र सञ्चारमाध्यमलाई छानी छानी एकपछि अर्को गरी कारबाहीको दायरामा ल्याउन थालेकोमा असन्तुष्टि व्यक्त गर्नुभयो ।
समाजवादी प्रेस सङ्गठनका सल्लाहकार प्रकाश खतिवडाले राज्यले सुनियोजित रूपमा प्रेस जगत्लाई कमजोर बनाउने खेल खेलिरहेको आरोप लगाउनुभयो ।
श्रमजीवी पत्रकार सङ्घका अध्यक्ष जन्मदेव जैसीले निरन्तर पत्रकार र सञ्चारमाध्यममाथि राज्यले हमला गरिरहेको अभिव्यक्ति दिनुभयो । 
