काठमाडौँ । सरोकारवालाहरूले पछिल्लो समय बढ्दै गइरहेको सहरीकरणसँगै वायुप्रदूषण प्रमुख समस्या रहेको भन्दै चिन्ता व्यक्त गरेका छन् ।
२०८२ जेठ २ गते शुक्रबारदेखि सुरु भएको सगरमाथा संवादको आज दोस्रो दिन “दिगो सहर र समुदाय” विषयक समानान्तर सत्रमा जलवायु परिवर्तनसँग थपिएको वायुप्रदूषण सहरको ठुलो समस्या बनेको र यसले विशेषगरी बालबालिका तथा वृद्धका स्वास्थ्यमा नकारात्मक असर पुऱ्याइरहेको भन्दै चिन्ता जनाइएको हो ।
सत्रका वक्ताहरूले जलवायुजन्य बिपत्का कारण सहर असुरक्षित रहेको बताए ।
ललितपुर महानगरपालिकाका प्रमुख चिरीबाबु महर्जनले गत असोजमा भएको भारी वर्षाका कारण काठमाडौँ उपत्यकामा अकल्पनीय विपद्का घटना भएको भन्दै यसले अनुकूलनको पाठ सिकाएको बताए ।
‘असोजको बाढी नयाँ जलवायुजन्य विनाशकारी घटना हुन्, जनचेताको अभावका कारण पनि बिपत्ले क्षति पुगेको छ’ उनले भने– ‘अब दिगो र जलवायुमैत्री पूर्वाधार विकास तथा बिपत् व्यवस्थापनको नीतिको प्रभावकारी रूपमा कार्यान्वयन गर्नुपर्छ ।’
काठमाडौँ महानगरपालिकाका उपप्रमुख सुनिता डङ्गोलले पनि पछिल्लो समयमा जलवायु परिवर्तनले नसोचिएको बिपत् निम्त्याएको भन्दै अब समयमा नै सचेत हुनुका साथै जलवायु न्यायका लागि आवाज बुलन्द बनाउनुपर्नेमा जोड दिए ।
सहरी विकास मन्त्रालयका सहसचिव पदमकुमार मैनालीले नयाँ सहर विकास गर्दा बिपर्त्मत्री सहर बनाउनुपर्ने र यसका लागि तीनै तहका सरकारबिच समन्वय हुनुपर्नेमा जोड दिए ।
ग्लोबल ग्रीन ग्रोथ सेन्टरका मुख्य सल्लाहकार डा. बिन्धुनाथ लोहनीले विश्वको तापमान वृद्धि दुई डिग्री सेल्सियसमा कायम राख्नुपर्ने र यसो गर्न नसकेमा सहरले जलवायुजञ्य चर्को समस्या भोग्नुपर्ने बताए ।
एग्रो फाउन्डेसन भारतका प्रमुख कार्यकारी अधिकृत तथा संस्थापक निर्देशक चरण सिंहले सहरी योजनामा हरित हाइड्रोजन, बायोमासलाई ऊर्जा र बिपत्मैत्री पूर्वाधारका योजना समावेश गर्न जरुरी रहेकामा जोड दिए ।
लगानी बोर्ड नेपालका प्रमुख कार्यकारी अधिकृत सुशील ज्ञवालीले सो सत्रको सहजीकरण गरेका थिए ।
