काठमाडौँ । अन्तर–व्यवस्थापिका संघ (आईपीयू) को दिगो विकास स्थायी समितिमा नेपाल पहिलोपटक सामेल हुन सफल भएको छ।
उज्बेकिस्तानको राजधानी ताश्केन्टमा भएको सम्मेलनमा माल्दिभ्स र इरानका दुई उम्मेदवारलाई पछि पार्दै राष्ट्रिय सभा सदस्य डा. अञ्जान शाक्य निर्वाचित भएकी छन्।
आईपीयूको दिगो विकास स्थायी समिति सदस्यमा एसिया–प्रशान्त क्षेत्रका तर्फबाट नेपालको प्रतिनिधित्व गर्दै शाक्य विजयी भएकी हुन्।
सभामुख देवराज घिमिरेले दिगो विकासको क्षेत्रमा गहिरो अनुभव हासिल गरेकी शाक्यलाई समर्थन गर्न भनी आईपीयूको दिगो विकास स्थायी समितिमा रहेका ३६ देशका सभामुखलाई पत्र पठाएका थिए। सभामुख देवराज घिमिरेसहितको टोली अहिले उज्बेकिस्तानमै छ।
सभामुख घिमिरे र सांसद डाक्टर शाक्यसहितको प्रतिनिधि मण्डल अन्तर(व्यवस्थापिका संघको १५०औँ वार्षिक सभा तथा असंलग्न आन्दोलन संसदीय सञ्जालको चौथो शिखर सम्मेलनमा सहभागी हुन उज्बेकिस्तानको राजधानी ताश्केन्ट पुगेको हो।
शाक्यले त्यहाँ दिगो विकास स्थायी समितिमा एसिया(प्रशान्त क्षेत्रका तर्फबाट उम्मेदवारी दिएकी थिइन्। यो मञ्चमा पहिलोपटक उपस्थिति जनाएको नेपाल पहिलो प्रयासमै सफल भएको हो।
