ठुलाबेसी (प्युठान) । नेकपा (मसाल) ३ नम्बर ब्युरो प्रवक्ता तिलक जिसीले सङ्घीयताका कारण देशको अस्तित्व नै धरापमा परेको बताउनुभएको छ ।
राजमो गौमुखी पालिका समितिको आयोजनामा २०८१ माघ २५ गते शुक्रबार ठुलाबेसीमा आयोजित अन्तरक्रियामा मन्तव्य राख्दै उहाँले सो अभिव्यक्ति दिनुभएको हो ।
सो अवसरमा जिसीले सङ्घीयताको कारण देशको एकता, अखण्डता र सार्वभौमसत्तामाथि गम्भीर चुनौती थपिएको बताउनुभयो ।
सङ्घीयतालाई खारेज गर्नु अपरिहार्य भएकोले पार्टीको सागुरो घेराबाट माथि उठ्न आम नेपाली देशप्रेमी जनसमुदायलाई उहाँले अपिल गर्नुभयो ।
कार्यक्रममा विशिष्ट अतिथि राष्ट्रिय जनमोर्चा लुम्बिनी प्रदेश सल्लाहकार बासुदेव पोख्रेलले उठेका प्रश्नको जबाफ दिनुभएको थियो ।
कार्यक्रममा राजमो प्युठानका अध्यक्ष ज्ञामुराम न्यौपाने, अखिल नेपाल महिला सङ्घकी केन्द्रीय सचिव तथा पूर्व प्रदेश सांसद तारा जिसी, नेकपा (एमाले) प्युठानका सचिवालय सदस्य टुकबहादुर केसीले पनि मन्तव्य राख्नुभएको थियो ।
सो अवसरमा अखिल नेपाल शिक्षक सङ्घ प्युठानका अध्यक्ष अर्जुन केसी, राजमो लिबाङका अध्यक्ष ओमलाल बोहोरा, राजमो नारिकोटका अध्यक्ष हुकुमबहादुर खड्का, राजमो पूजाका अध्यक्ष शालिकराम शर्मा, जातीय समता समाजकी सावित्रा टोमटा, अखिल नेपाल किसान महासङघ (अप्फा) की पार्षद तारा पुरी र शिक्षक सङ्घ गौमुखीका अध्यक्ष बलबहादुर विकको पनि आतिथ्य रहेको थियो ।
राजमो गौमुखीका कावा अध्यक्ष वीरबहादुर केसीको अध्यक्षता, सचिव कृष्ण जैसीको सञ्चालनमा अगाडि बढेको सो कार्यक्रममा राजमो जिल्ला सदस्य भरत केसीले आधारपत्र प्रस्तुत गर्नुभएको थियो ।
