कञ्चनपुर । राष्ट्रिय जनमोर्चाले गर्न लागेको संघीयताविरुद्ध राजधानी केन्द्रित आन्दोलनको प्रचारप्रसार बढ्दै जाँदा सर्वसाधारण जनताको राजमोप्रति आकर्षण बढ्दै गएको छ ।
सर्वसाधारण नागरिकहरू राजमोले सञ्चालन गरेको हस्ताक्षर अभियानमा सहभागी भएर संघीयताविरुद्ध आफ्नो अभिमत जाहेर गर्नुका साथै कैयौँ स्थामा राजमोको सदस्यता लिएर पार्टी प्रवेश गर्ने क्रमसमेत चलेको छ ।
सोही क्रममा शनिबार कञ्चनपुरमा विभिन्न क्षेत्रका व्यक्तिहरू राजमोमा प्रवेश गरेका छन् ।
नेपाल सुनचाँदी व्यवसायी संघ सुदूरपश्चिम प्रदेश सचिव नरेन्द्र सुनार, युवाहरू उमेश मिस्त्री, विजय कार्कीलगायत राजमोमा प्रवेश गरेको राजमो कञ्चनपुरका सचिव लालबहादुर कुँवरले जानकारी दिनुभयो ।
उहाँहरूलाई राष्ट्रिय जनमोर्चा प्रदेश सचिव राजाराम चौधरीले पार्टीको सदस्यता प्रदान गरी स्वागत गर्नुभयो ।
राजमो भीमदत्त नगरसमितिले काठमाडौं केन्द्रित आन्दोलनका लागि गरेको तयारी भेलामा पूर्वजिल्लाअध्यक्ष जयबहादुर मल्ल, मजदुर नेता जनक कुँवर, राजमो जिल्ला सचिव लालबहादुर कृुँवरले सम्बोधन गर्नुभएको थियो ।
राजमो भीमदत्त नगर समितिले आगामी चैत २४ गतेदेखि आयोजना हुने राजधानी केन्द्रित आन्दोलनमा सहभागी हुन विभिन्न निर्णयहरू गरेको छ ।
