टेकराज भुसाल, सन्धिखर्क ।
भूमिकास्थान नगरपालिका वडा नं. १ स्थित बालशिक्षा माध्यमिक विद्यालयले विद्यालयको स्थापनाको पचासौँ वर्षप्रवेशको अवसरमा स्वर्ण महोत्सव कार्यक्रम सम्पन्न भएको छ ।
साताव्यापी विविध खेलकुद र अतिरिक्ति क्रियाकलाप गरेको विद्यालयले २०८१ माघ १२ गते शनिवार सो कार्यक्रम सम्पन्न भएको हो ।
भूमिकास्थान नगरपालिका नगरप्रमुख झबिलाल थापाले पानसमा बत्ती बालेर महोत्सवको उद्घाटन गर्नुभएको थियो।
सो अवसरमा मन्तव्य राख्दै थापाले शिक्षाको विकासबिना राष्ट्रको विकास हुन नसक्ने हुँदा सबै मिलेर आआफ्नो ठाउँबाट शिक्षाको विकासका लागि सकेको योगदान गर्नुपर्ने बताउनुभयो ।
विद्यालयको भौतिक र शैक्षिक उपलब्धिको प्रशंसा गर्दै अझै राम्रो गर्दै जाने विश्वास व्यक्त गर्दै नगरपालिकाबाट विद्यालयलाई आगामी दिनमा आवश्यक सहयोग निरन्तर रहने प्रतिबद्धता व्यक्त गर्नुभयो ।
कार्यक्रममा नगर उपप्रमुख बालाकृष्ण बन्जाडे, शिक्षा विकास तथा समन्वय एकाइ अर्घाखाँचीका प्रमुख मनिराम पराजुलीलगायतले मन्तव्य राख्नुभएको थियो ।
विद्यालय व्यवस्थापन समिति अध्यक्ष काशिराम गमालको अध्यक्षता, शिक्षक चेतबहादुर थापाको सञ्चालनमा अघि बढेको उक्त कार्यक्रममा प्रधानाध्यापक युवराज खनालले वार्षिक प्रगति विवरण प्रस्तुत गर्नुभएको थियो ।
