टेकराज भुसाल, सन्धिखर्क ।
सङ्घीयता खारेजीको माग राख्दै आगामी चैत २४ गतेदेखि ३० गतेसम्म काठमाडौँमा आन्दोलनको घोषणा गरेका राष्ट्रिय जनमोर्चाले अर्घाखाँचीमा प्रचारप्रसार, भित्तेलेखन, सभालगायतका गतिविधिलाई तीव्रता दिन थालेको छ ।
सोहीअनुरूप २०८१ माघ ४ गते शुक्रबार भूमिकास्थानको ढाकाबाङमा विरोधसभा सम्पन्न भएको हो ।
विरोधसभालाई सम्बोधन गर्दै राजमो लुम्बिनी प्रदेश समितिका सल्लाहकार शेरबहादुर बिसीले देशमा बढ्दै गइरहेको भ्रष्टाचार, कालाबजारी लुटतन्त्रको मुख्य जड सङ्घीयता भएको बताउँदै सङ्घीयता देशका लागि महङ्गो सावित भइसकेकाले खारेजीको माग गर्नुभयो ।
देश सङ्घीयताका कारण आर्थिक रूपमा टाट पल्टेको भन्दै जनताले कर तिरेर प्रदेशका मन्त्री, सांसद र कर्मचारी पाल्न नसक्ने बताउँदै सङ्घीयता खारेज गर्नुपर्नेमा जोड दिनुभयो ।
त्यस्तै, राजमोका केन्द्रीय सदस्य तथा भूमिकास्थान नगरपालिका नगरप्रमुख झबिलाल थापाले सङ्घीयताकै कारण देशभर संस्थागत र नीतिगत भ्रष्टाचार भएको देश आर्थिक रूपमा कङ्गाल हुँदै गएको बताउनुभयो ।
कार्यक्रममा अखिल नेपाल शिक्षक सङ्घ केन्द्रीय कोषाध्यक्ष टेकबहादुर थापा, राजमो जिल्ला उपाध्यक्ष गोपाल पौडेल, भूमिकास्थान नगर समितिका अध्यक्ष हिमलाल बन्जाडेलगायतले बोल्दै सङ्घीयता विरुद्ध अबको आन्दोलन निर्णायक आन्दोलन भएको बताउँदै सम्पूर्ण राष्ट्रप्रेमीहरू एकजुट भएर यो आन्दोलनमा सरिक हुनुपर्ने जोड दिनुभएको थियो ।
सङ्घीयताका कारण देशको राष्ट्रियता कमजोर बनेको, जनतालाई करको भार थोपरिएको र विकास निर्माणमा लगाउनुपर्ने रकम प्रशासनिक खर्चमा लगाउनुपरेको ठहर गरेको राजमोले अन्तरिम संविधानमा सङ्घीयता सामेल गरेदेखि नै विरोध गर्दै आएको छ ।
