काठमाडौँ । मङ्सिर १६ गते आइतबार सम्पन्न स्थानीय तह उपनिर्वाचनको थप नतिजा आउने क्रम जारी छ ।
मोरङको ग्रामथानमा माओवादी केन्द्र
मोरङको ग्रामथान गाउँपालिकाको अध्यक्ष पदमा नेकपा (माओवादी केन्द्र) का उम्मेदवार नमोनारायण माझीले ६,९६९ मत ल्याएर निर्वाचित हुनुभएको छ । उहाँको निकटतम प्रतिष्पर्धी नेपाली काङ्ग्रेसका बलराम सरदार थारूले ५,३३३ मत ल्याउनुभएको थियो ।
गत असार ३ गते ग्रामथानका तत्कालीन अध्यक्ष जयप्रकाश गच्छदारको निधनपछि उपनिर्वाचन भएको हो ।
बर्दियाको ठाकुरबाबा–४ मा काङ्ग्रेस
बर्दियाको ठाकुरबाबा नगरपालिका–४ को वडाध्यक्ष पदमा नेपाली काङ्ग्रेसका उम्मेदवार अमिन थारूले १,०४३ मत प्राप्त गरेर विजयी हुनुभएको छ । उहाँका निकटतम प्रतिष्पर्धी नेकपा (माओवादी केन्द्र) का उम्मेदवारले ६७८ मत प्राप्त गर्नुभएको थियो ।
जाजरकोट नलगाडको उपप्रमुखमा माओवादी केन्द्र
जाजरकोट नलगाड नगरपालिकामा भएको उपप्रमुख पदमा नेकपा (माओवादी केन्द्र) का उम्मेदवार देवका लामिछानेले ४,२७२ मत प्राप्त गरेर निर्वाचित हुनुभएको छ । उहाँका निकटतम प्रतिष्पर्धी नेपाली काङ्ग्रेसका उम्मेदवार इन्द्राचन्द सिंहले ३,१४७ मत प्राप्त गर्नुभएको थियो ।
उदयरपुरको त्रियुगा–१२ मा माओवादी केन्द्र
उदयपुरको त्रियुगा नगरपालिका–१२ को वडाध्यक्षमा नेकपा (माओवादी केन्द्र) का उम्मेदवार नवीनकुमार बान्तवा राईले ९२३ मत ल्याएर विजयी हुनुभएको छ । उहाँका निकटतम प्रतिष्पर्धी नेकपा (एमाले) का लक्ष्मीनारायण चौधरीले ६०८ मत प्राप्त गर्नुभएको थियो ।
काठमाडौँ–१६ मा रास्वपा
काठमाडौँ महानगरपालिका–१६ को वडाध्यक्ष पदमा राष्ट्रिय स्वतन्त्र पार्टीकी रोजिना श्रेष्ठले २,९०९ मतले विजयी हुनुभएको छ । उहाँका निकटतम प्रतिष्पर्धी नेकपा (एमाले) का उम्मेदवार लक्ष्मीरत्न महर्जनले २,२२० मत प्राप्त गर्नुभएको थियो ।
काङ्ग्रेसबाट विजयी तत्कालीन वडाध्यक्षमुकुन्द रिजालको निधन भएपछि यहाँ उपनिर्वाचन भएको हो ।
कीर्तिपुर–१ मा काङ्ग्रेस
काठमाडौँकै कीर्तिपुर नगरपालिका–१ को वडाध्यक्षमा नेपाली काङ्ग्रेसका इच्छाकुमार महर्जनले ५६२ मत प्राप्त गरेर विजयी हुनुभएको छ । उहाँका निकटतम प्रतिष्पर्धी नेकपा (एमाले) का हर्ष महर्जनले ४९८ मत प्राप्त गर्नुभएको थियो ।
महोत्तरीको रामगोपालपुर–२ मा एमाले
महोत्तरीको रामगोपालपुर नगरपालिका–२ को वडाध्यक्षमा नेकपा (एमाले) का सकिबुल खाँले ६३१ मत प्राप्त गरेर निर्वाचित हुनुभएको छ । उहाँको निकटतम प्रतिष्पर्धी नेकपा (माओवादी केन्द्र) की आइतीकुमारी यादवले ५३४ मत प्राप्त गर्नुभएको थियो ।
