वासिङ्टन डिसी । विश्व बैङ्क तथा अन्तर्राष्ट्रिय मुद्रा कोषले रोजगारी सिर्जनामा सघाउने भएको छ ।
विश्व बैङ्क र मुद्रा कोषको वार्षिक बैठकमा भाग लिने सिलसिलामा अमेरिकामा रहनुभएका उपप्रधान एवम् अर्थमन्त्री विष्णु पौडेलले बुधबार उक्त बैङ्कका दक्षिण एसिया मामिला हेर्ने उपाध्यक्ष मार्टिन रेजरसँगको भेटमा सो जानकारी दिइएको हो ।
वार्ता नेपालमा रोजगारी सृजना गर्ने विषयमा केन्द्रित रहेको नेपाली राजदूतावासले जनाएको छ । नेपालमा व्यावसायिक वातावरणको सुधार, मुख्य पूर्वाधार आयोजनाहरूको कार्यान्वयन तथा विप्रेषण आप्रवाहका माध्यमबाट पनि रोजगारी सिर्जना गर्ने बारेमा छलफल भएको थियो ।
त्यस्तै, विश्व बैङ्कले नेपाललाई प्राकृतिक विपत्तिपछिको पुनर्निर्माणका निम्ति सहयोग गर्ने भएको छ । सहायतासम्बन्धी सम्झौतामा नेपाल सरकार र विश्व बैङ्कबिच हस्ताक्षर भएको छ ।
सम्झौतापत्रमा अर्थ मन्त्रालयका सचिव रामप्रसाद घिमिरे र नेपालका लागि विश्व बैङ्कका प्रतिनिधि डेभिड सिसलेनले हस्ताक्षर गर्नुभएको छ । सम्झौताअनुसार विश्व बैङ्कले १५ करोड डलर उपलब्ध गराउने छ ।
उपप्रधान तथा अर्थमन्त्री पौडेल र विश्व बैङ्क (दक्षिण एसिया मामिला) का उपाध्यक्ष मार्टिन रेजर उपस्थितिमा भएको हस्ताक्षर कार्यक्रममा नेपालको प्राकृतिक र जलवायु परिवर्तनका कारण आइपर्ने स्वास्थ्य जटिलताको लागि स्रोत परिचालन गरिने जनाइएको छ ।
