अशोक खनाल, भालुवाङ (दाङ) ।
दुई दिनदेखि अवरुद्ध पूर्वपश्चिम लोकमार्ग आज २०८१ साउन १६ गते बुधबारबाट सुचारु भएको छ ।
हिजो मङ्गलबार सडक दुर्घटनामा मृत्यु भएका लोकप्रसाद भट्टराईको परिवारलाई नौ लाख ५० हजार क्षतिपूर्ति दिने सहमतिसँगै लोकमार्ग सुचारु भएको हो ।
पश्चिमबाट पूर्वतर्फ आइरहेको सुपप्र ००१ ख २७७९ नम्बरको ट्रकले ठक्कर दिदा ५० वर्षीय भट्टराईको घटनास्थलमै मृत्यु भएको थियो । आफन्त र स्थानीय बासिन्दाद्वारा कडा कारबाही र उचित क्षतिपूर्तिको माग गर्दै त्यहाँ सडक अवरुद्ध गरिएको थियो ।
स्थानीय प्रहरी प्रशासन, जनप्रतिनिधि, व्यवसायी अगुवाहरूको रोबरमा बुधबार भएको छलफलमा क्षतिपूर्ति दिने र दोषीलाई कानुनी कारबाही गर्ने सहमति भएबमोजिम अवरुद्ध सडक सुचारु भएको छ ।
मृतक भट्टराईको शब अस्पतालमा पोस्टमार्टमपछि आज दिउसो राप्ती नदीघाटमा दाहसंस्कार गरिएको छ ।
जेठा छोरा बाबुराम भट्टराई र कान्छा छोरा तुलसीराम भट्टराईले दागबत्ती दिएर अन्तिम मृतक भट्टराईको बिदाइ गरिएको थियो । ।
घाटमा यहाँको वातावरण शोकाकूल छ भने मृतकप्रति श्रद्धाञ्जली दिन ठुलो सङ्ख्यामा इष्टमित्र र स्थानीय बासिन्दाको उपस्थिति रहेको थियो ।
