काठमाडौं । राष्ट्रिय जनमोर्चाका अध्यक्ष चित्रबहादुर केसीले युवा विद्यार्थीहरूले राजनीति गर्न हुँदैन भन्ने सोचाई घातक रहेको बताउनुभएको छ ।

अखिल नेपाल युव संघ, काठमाडौंले शनिबार (असार २९ गते) कपनस्थित राजमो केन्द्रीय कार्यालयमा आयोजना गरेको प्रशिक्षण कार्यक्रममा केसीले यस्तो बताउनुभएको हो ।

उहाँले युवाहरूलाई देशभित्र केही हुँदैन भन्ने भाष्य तयार गरिएको र सानै कक्षादेखि विदेश जानुपर्छ भन्ने सिकाइएको बताउनुभयो ।

‘पन्चायतकालमा विद्यार्थीले वा अरु कसैले पनि विरोध गर्न पाउने अवस्था थिएन, तर सचेत शिक्षकले त्यो व्यवस्था विरुद्ध सिकाउने गर्दथे । विद्यार्थीलाई देशभक्ति, लोकतन्त्र, स्वतन्त्रता जस्ता कुराहरू पढाइन्थ्यो’ लामो समय प्रधानाध्यापक रहेका केसीले भन्नुभयो, ‘तर अहिले उल्टो भयो । १२ कक्षा पढ्यो कि विदेश जानको लागि पढ्ने गरिन्छ । नयाँ पिँडिले देशको बारेमा जानेपछि विद्रोह गर्छ र आफ्मो साशन ढल्छ भनेर नै विदेशी संस्कृती, शिक्षा सिकाउने गरिएको छ, यो घातक छ ।

उहाँले भविष्यमा कस्तो नागरिक बन्ने भन्नेकुरा युवा विद्यार्थी उमेरमै तय हुने पनि बताउनुभयो । युवाहरूलाई राम्रो–नराम्रो छुट्याउन सक्ने बन्नुपर्ने पनि बताउनुभयो ।

अध्यक्ष केसीले भन्नुभयो, ‘अहिले समाजमा राम्रो भन्दा नराम्रो धेरै सुनिने देखिने गरेको छ । सानैदेखि राम्रो सिके त्यतै विकास हुन्छ । शासकको ध्यान नयाँ पिँडि राम्रोतिर नजाओस् भन्ने हुन्छ । हामी भोलि के हुने कलाकार लेखक जुवाडे के हुने राम्रो नराम्रो नया पिँडिले अहिले देखि नै सोच्नु पर्छ ।’

अहिले युवाहरूलाई खाऊ, फिऊ, मोज गर भन्नेतर्फ ध्यान भड्काउने गरिएको र राष्ट्रको, जनताको ध्यानबाट अलग पार्ने प्रयास भइरहेको उहाँको भनाई थियो ।

युवाहरूलाई देशबाट भगाउने र विदेशीलाई देश भित्र्याउने, देशको स्रोत साधन सिमित व्यक्तिको फाइदाका लागि विदेशीलाई सुम्पने गरिएकोतर्फ युवाहरू सचेत हुनुपर्नेमा उहाँको जोड थियो ।

‘नेपालको खनिज पदार्थ विदेशीको हातमा छ । नदी नाला सबै विदेशीको हातमा छ । शोषकहरुले जनताको दिमागमा विष भर्ने गरिरहेका छन् । कमाउ खाउ मोज गर भन्ने संस्कृती शोषक संस्कृती हो’ उहाँले भन्नुभयो, ‘सबै युवा विद्यार्थीले सहि राजनीति समात्नु पर्दछ । त्यस्को लागि हाम्रो पार्टी नै सहि छ र त इतिहास निमाण भएको छ ।’

कार्यक्रममा नेकपा (मसाल) का महामन्त्री मोहनविक्रम सिंह र राष्ट्रिय जनमोर्चाका नेता आनन्द शर्माले पनि प्रशिक्षण दिनुभएको थियो ।

• देश कस्तो बनाउने भन्ने तागत युवाहरूमा छ : महामन्त्री सिंह
• युवालाई विदेश पठाएर रेमिट्यान्सले देश चलाउने राज्यको चरित्र बदल्नुपर्छ : आनन्द शर्मा