काठमाडौं । नारायणगढ–मुग्लिन सडकको सिमलतालमा लेदोसहितको पहिरोले दुईवटा बस बगाउँदा त्रिशूली नदीमा बेपत्ता भएका छन् । ती बसमा चालकसहित ६५ जना रहेका बताइएको छ ।

घटनास्थलमा पुगेका चितवनका प्रमुख जिल्ला अधिकारी इन्द्रदेव यादवका अनुसार आज बिहान ३ः३० बजे काठमाडौँबाट रौतहटको गौर जाँदै गरेको गणपति डिलक्स र वीरगञ्जबाट काठमाडौँ आउँदै गरेको एञ्जल लेखिएको बस पहिरोले बगाउँदा त्रिशूलीमा खसेका हुन् ।

प्रजिअ यादवका अनुसार गौर जाँदै गरेको बसमा ४१ र काठमाडौँ जाँदै गरेको बसमा २४ जना रहेका थिए । उनले ती बसमा रहेका यात्रुको यकिन विवरण प्राप्त भइ नसकेको बताए ।

घटनामा धेरै जनाको हताहती भएको आशंका गरिएको छ।

घटनास्थलमा अहिले नेपाल प्रहरी, सशस्त्र प्रहरी बल नेपाल नम्बर १७ गण चितवन बाटबाट ३५ जना र बिपद ब्यबस्थापन तालिम शिक्षालबाट ७ जना गोताखोर परिचालन भएका छन्।

पहिरो खसेपछि मुग्लिन–नारायणगढ सडक पनि अबरुद्ध छ।

निरन्तर परेको पानीका कारण घटनास्थलसम्म पुग्न मुस्किल भएको जिल्ला प्रहरी कार्यालय चितवनले जनाएको छ।

ठाउँ/ठाउँमा खसेको पहिरोका कारण गोताखोरको टोली जाममा परेका कारण घटनास्थलसम्म आइपुग्न नसकेको जिल्ला प्रहरी कार्यालय चितवनका प्रहरी प्रवक्ता डीएसपी भेषराज रिजालले जानकारी दिए।

उनका अनुसार घटनास्थलमा बसको थोरै भाग देखिएको छ। नदीमा पानीको वहाब निकै बढेको छ। पानी परिरहेको छ। पहिरोका कारण सडकमा लामो जाम पनि छ। जसले गर्दा तत्काल उद्धार कार्यमा खटिन समस्या भैरहेको डीएसपी रिजालले बताए ।

घटनाको विषयमा प्रहरीले काठमाडौँबाट गौर जाँदै गरेको गणपति डिलक्स बसबाट हाम फालेर ज्यान गोगाएका ३ यात्रुसँग बुझ्ने काम गरिरहेको छ।