बुटवल । रूपन्देहीको धागो कारखानास्थित कोरोना विशेष (अस्थायी) अस्पतालमा उपचार गर्दागर्दै मृत्यु भएका बाबुराम थापाको शव नौ दिन बितिसक्दासमेत उठ्न सकेको छैन ।
कोरोना संक्रमणको आशंकामा अस्पताल भर्ना भएका पाल्पाको रिब्दीकोट–५ का ३४ वर्षीय थापाको चैत १६ गते उपचारका क्रममा मृत्यु भएको थियो । उनको उपचारमा लापरबाही गरिएको भन्दै परिवारले क्षतिपुर्ती नपाएसम्म शव नउठाउने अडान राखेका छन् ।
दुबईमा ट्याक्सी चालक थापा चैत ६ गते नेपाल आएका थिए । ज्वरो, खोकीका लक्षण देखिएपछि उनी परिवारको सल्लाह बमोजिम बुटवल कोरोना विशेष अस्पतालमा चैत १३ गते भर्ना भएका थिए । तर, उनको मृत्यु भइसकेपछि गरिएको स्वास्थ्य परीक्षणले उनमा कोरोना भाइरस नरहेको देखाएको थियो ।
परिवारले सामान्य अवस्थाका बिरामीको मृत्यु हुनुको कारण कोरोना भाइरस नभए के हो त ? भनि प्रश्न गर्दै आएका छन् । उपचारमा लापरवाही गरिएको भन्दै आफन्तले क्षतिपुर्ती र लापरबाही गर्ने चिकित्सकमाथि कारबाहीको माग गर्दै शव उठाउन अस्वीकार गरेका हुन् ।
यो पनिः राजमो रुपन्देहीको प्रश्नः बुटवलमा मृत्यु भएका युवामा कोरोना नभए मृत्युको कारण के हो ?
आफन्त र अस्पतालका डाक्टरले समेत उनमा कोरोना संक्रमण रहेको आशंका गर्दै आएका छन् । कतिपय बिरामीको पहिलो परीक्षणमा कोरोना नेगेटिभ देखिएपनि दोस्रो तेस्रो परीक्षण पछि पोजेटिभ भेटिने गरेको विज्ञहरु बताउँछन् ।
काठमाडौंको टेकुस्थित राष्ट्रिय जनस्वास्थ्य प्रयोगशालाले गरेको पहिलो नमुना परीक्षणले थापामा कोरोना भाइरसको संक्रमण नरहेको पुष्टि गर्यो । तर पुनः दाहोर्याएर नमुना परीक्षण गर्न पाइएन, किनकि बिरामीको मृत्यु भइसकेको थियो । कतिपय अवस्थामा कोरोनाको संक्रमण भए पनि एकैपटकको नमुना परीक्षणले सही नतिजा दिन नसक्ने विज्ञहरू बताउँछन् ।
यसैकारण नतिजा नेगेटिभ आए पनि उनमा जुन खालका जटिल लक्षण देखिएका थिए, त्यस आधारमा उनलाई कोरोनाको संक्रमण थिएन भनेर ग्यारेन्टी गर्न नसकिने बुटवल कोरोना विशेष अस्पतालका चिकित्सकले बताइरहेका छन् । यसको अर्थ उनको मृत्यु कोरोनाकै कारण भएको हुन सक्न भन्ने आशंका हो ।
पीडित परिवारले मृतकका दुई साना नाबालकको उच्च शिक्षासम्मको व्यवस्था गर्नुपर्ने, मृतककी श्रीमतीलाई रोजगारीको व्यवस्था गर्नुपर्ने र २५ लाख रुपैयाँ क्षतिपुर्ती दिनुपर्ने माग गर्दै आएका छन् ।
यद्यपी रुपन्देहीको सैनामैना गाउँपालिकाले थापाकी पत्नीलाई रोजगारी दिने र प्रदेश सरकारले बालकहरुलाई शिक्षाको व्यवस्था मिलाउने प्रतिवद्धता जनाएका छन् ।
