दीपेन्द्र परियार, बागलुङबजार ।
बागलुङ बरेङ गाउँपालिकाका महिला बालबालिका, किशोरकिशोरीको पोषणमा सुधार गर्न पोषणसम्बद्ध सरोकारवालासँग अन्तरक्रिया कार्यक्रम सम्पन्न भएको छ ।
२०८० माघ १७ गते बुधबार बरेङको सुदालामा सो कार्यक्रम सम्पन्न भएको हो ।
कार्यक्रमको समापन गर्दै गाउँपालिका अध्यक्ष कृष्णप्रसाद शर्माले पालिकाको पोषण अवस्थामा सुधार र बहुक्षेत्रीय अभ्यासलाई संस्थागत गर्दै स्थानीय तहको नीति, योजना, कार्यक्रम र सेवा प्रवाहमा सुधार गरी पोषणमैत्री स्थानीय शासन पद्धति अवलम्बनतर्फ अग्रसर रहेको जानकारी दिनुभयो ।
कार्यक्रमलाई सहजीकरण गर्दै जिल्ला स्वास्थ्य कार्यालय बागलुङकी जनस्वास्थ्य निरीक्षक लक्ष्मी शर्माले कृषिजन्य उपज उत्पादन गर्दा अपनाइएका विधि, माटो र पोषणबारे अन्तरसम्बन्ध, विषादिरहित खाद्य तथा पोषण, रैथाने खाना, स्वस्थकर खानपान, कुपोषणको चक्र, मातृ तथा नवजात शिशुको पोषणबारे जानकारी गराउनुभएको थियो ।
पुरुषोद्धय माविका विद्यार्थी, कृषि, बिउबिजन तथा विषादि व्यवसायी, जनप्रतिनिधि, कर्मचारीले कार्यक्रममा विविध विषयमा जिज्ञासा राख्नुका साथै अगुवा कृषक सन्तबहादुर श्रीसले आफ्ना अनुभव राख्नुभएको थियो ।
सोही अवसरमा बोल्दै गाउँपालिकाका निमित्त प्रमुख प्रशासकीय अधिकृत सूर्यप्रसाद शर्माले पोषणमा गरिने लगानीले बालबालिका, उनीहरूका परिवार र समग्र समुदायलाई नै दीर्घकालीन प्रभाव पार्ने बताउनुभयो ।
कार्यक्रममा शिक्षक, विद्यार्थी, कृषि उपज तथा विषादि व्यवसायी कृषक, जनप्रतिनिधि, स्वास्थ्यकर्मी र कर्मचारीहरूको सहभागिता रहेको थियो ।
अध्यक्ष कृष्णप्रसाद शर्माको अध्यक्षता, पालिकाको सामाजिक विकास समितिका संयोजक तथा प्रवक्ता तुफान पुनको स्वागत तथा बरेङ गाँउपालिकाका जनस्वास्थ्य निरीक्षक पदमबहादुर पुनको सञ्चालनमा उक्त कार्यक्रम सम्पन्न भएको थियो ।
