काठमाडौँ । सुदूरपश्चिम प्रदेशलाई हराउँदै एपिएफ क्लबले प्रधानमन्त्री कप एकदिवसीय राष्ट्रिय क्रिकेट प्रतियोगितामा चौथो जित दर्ता गरेको छ ।
मङ्गलबार भएको खेलमा एपिएफले सुदूरपश्चिमलाई तीन विकेटले पराजित गरेको हो। सुदुरपश्चिमले दिएको ८८ रनको झिनो लक्ष्य एपीएफले १४।१ ओभरमा ७ विकेटको क्षतिमा भेट्टायो।
सन्दीप जोरा १८ र चन्दन राम शून्य रनमा नटआउट रहे। आशिफ शेखले १५ र भुवन कार्कीले १४ रन थपे। प्रदीप ऐरि १२ रन बनाउँदा एलबीडब्लु धरापमा परे।
सुमित महर्जन, कप्तान रोहित पौडेल र अमर राउटेला समान ४ रन बनाउँदै पेभेलियन फर्के। ओपनर लोकेश बम ६ रनमा आउट भए।
दिपक चन्दले ४ विकेट लिएपनि टोलीको हार टार्न सकेनन्। उनले ७ ओभरमा ३६ रन खर्चे।
नरेन साउदले ६ ओभरमा ४४ रन खर्चेर ३ विकेट लिए।
त्यसअघि माथिल्लो मुलपानी क्रिकेट मैदानमा एपीएफले टस जितेर फिल्डिङ रोजेपछि ब्याटिङ गरेको सुदूरपश्चिम १६।२ ओभरमा ८७ रनमा अलआउट भयो।
सुदुरका लागि नारायण जोशी ३१ रनमा नटआउट रहे। खडक बोहोरा २४ रनमा आउट भए। अन्य ब्याटरले दोहोरो अंकको स्कोर छुन सकेनन्।
सुदूरलाई कम स्कोरमा रोक्न एपीएफका चन्दन रामले ५विकेट लिए। सात ओभर बलिङ गरेका उनले ५१ रन दिए।
६।२ ओभर बलिङ गरेका भुवन कार्कीले १ मेडन राख्दै १४ रन खर्चेर ३ विकेट लिए।
कप्तान रोहित पौडेलले २ ओभरमा १४ रन दिएर २ विकेट झारे।
प्रतियोगिताको सात खेलमा ४ खेलमा जित र ३ खेलमा हार व्यहोरेको एपीएफको फाइलनमा पुग्ने सम्भावना जिवितै छ। ४ जित निकालेको एपीएफ ८ अंकमा तालिकाको पाचौँ स्थानमा छ।
समान खेल र अकबाट सुदूरपश्चिम भने छैटौँ स्थानमा छ।
