बुटवल । राष्ट्रिय जनमोर्चा रुपन्देहीले बुटवलको कोरोना विशेष अस्पतालमा मृत्यु भएका युवाको शव एक हप्तासम्म पनि नउठेको प्रति पार्टीको ध्यानाकर्षण भएको जनाएको छ ।
शनिबार राजमो जिल्ला अध्यक्ष बद्रे आलमले विज्ञप्ति प्रकाशित गरी ति युवाको मृत्यु कोरोना संक्रमणको कारण होइन भने के कारणले भएको हो ? स्पष्ट पार्न आग्रह गर्नुभएको छ । लापरवाहीका कारण वावुराम थापा क्षत्रीको मृत्यु भएको आशंका गर्दै राजमोले घटनाको छानबिन र दोषी उपर कारबाही गर्न एवं पीडित परिवारलाई क्षतिपुर्ती दिन पनि माग गरेको छ ।
कोरोना अस्पतालका डा. सुर्दशन थापाले नै ति युवामा कोरोना संक्रमण भएको आशंका गरिरहँदा र उनको रिपोर्ट नेगेटिभ देखिनु तथा एक हप्तासम्म पनि शव नउठ्नु राज्यको हद दर्जाको लापरवाही भएको अध्यक्ष आलमले बताउनु भएको छ ।
अध्यक्ष आलमद्वारा प्रेसित विज्ञप्तिमा भनिएको छ,
‘रिब्दिकोट ५ कुसुमखोला पाल्पा हाल सैनामैना रुपन्देहीका वावुराम थापाक्षत्रीको कोरोनाको आशंकामा लुम्बिनी प्रादेशिक अस्पताल अन्र्तगत बुटवल धगो कारखानामा बनाइएको कोरोना (अस्थायी) अस्पतालमा २०७६ चैत्र १३ गते देखि उपचारार्थ राखिएको र २०७६ चैत्र १६ गते मृत्यु भएको खबरले राष्ट्रिय जनमोर्चा रुपन्देही स्तब्ध बनेको छ । मृतक परिवारको दाबी अनुसार विरामीको स्वाव परिक्षण ढिलो गरि गरिएको र विरामीको उपचारमा ध्यान नदिएका कारण ज्यान गएको बताइएको छ ।
यदि अस्पतालको लापर्वाहीबाट विरामीको ज्यान गएको हो भने अत्यन्तै गम्भीर र संवेदनशील विषय बन्न जान्छ । यस वारे सम्बन्धित जिम्मेवार निकायको ध्यान जान जरुरी छ । सत्य तथ्य के हो ? त्यस बारे आवश्यक छानविन गर्न अविलम्ब एक निस्पक्ष न्यायिक आयोग गठन गरि दोषीमाथि आवश्यक कार्यवाही गर्न र मृतक परिवारलाई उचित क्षतिपूर्तिको ब्यवस्था गर्न राजमो रुपन्देही माग गर्दछ ।
कोरोना अस्पतालका संयोजक डा. सुर्दशन थापाले एक स्थानीय पत्रिकासँग कुरा गर्दै भन्नु भएको छ , ‘विरामीको स्वाव परिक्षण नेगेटिभ भएपनि मृतक विरामी कोरोनाकै कारणले मृत्यु भएको आशंका छ ।’ यदि त्यसो हो भने मृतकको शव व्यवस्थापन गर्ने जिम्मेवारी अस्पताल व्यवस्थापन पक्षकै हुन्छ । मृत्यु भएको छ/सात दिनसम्म पनि शव व्यवारिसे वनाउनु हद दर्जाको लापर्वाही हो ।
साथै, कोरोना भाइरसबाट बच्न र बचाउन सामाजिक दूरी कायम राख्न तथा राज्यले स्वास्थ्य सम्बन्धी दिएको निर्देशन पालना गर्न सम्पूर्ण जनसमुदायहरुलाई राजमो रुपन्देही हार्दिक अपिल गर्दछ ।’
