काठमाडौँ । नेकपा (मसाल) ले भारतको अयोध्यामा राममन्दिर उद्घाटनका दिन नेपालको कपिलवस्तुका विभिन्न पालिका तथा मधेस प्रदेशका कतिपय जिल्लामा माघ ८ गतेका दिन बिदा दिनुलाई अराष्ट्रिय कार्य बताएको छ ।
महामन्त्री मोहनविक्रम सिंहको हस्ताक्षरमा २०८० माघ ७ गते आइतबार प्रेसवक्तव्य जारी गर्दै पार्टीले आफ्नो धारणा सार्वजनिक गरेको हो ।
केही समयपहिले भारतको नयाँ संसद् भवनको नक्सामा नेपालको लुम्बिनी र कपिलवस्तुलाई समेत राखिएको स्मरण गराउँदै पार्टीले अहिले कतिपय पालिकाले गरेका यस खालको कार्यबारे आफ्नो दृष्टिकोण स्पष्ट पार्न सरकारसित पनि माग गरेको छ ।
एवम् प्रकारले पार्टीले सरकारसित यस खालका अराष्ट्रिय गतिविधि रोक्न तथा यस खालको कार्य विरुद्ध कडा कदम उठाउन पनि माग गरेको छ ।
प्रेसवक्तव्यको पूर्ण पाठ :
“भारतको अयोध्यामा राममन्दिर उद्घाटनको दिन नेपालको कपिलवस्तु जिल्लाका कृष्णनगर, महाराजगञ्ज र कपिलवस्तु नगरपालिका तथा विजयनगर, यशोधरा, मायादेवी, शुद्धोधन गाउँपालिकाले बिदा दिने निर्णय गरेको सार्वजनिक भएको छ ।
केही समयपहिले भारतको नयाँ संसद् भवनमा राखिएको नक्सामा नेपालका लुम्बिनी र कपिलवस्तुलाई समेत समावेश गरिएको थियो । भारतको उक्त कार्यलाई नेपालको राष्ट्रियता, स्वतन्त्रता र स्वाधीनतामाथिको गम्भीर अतिक्रमण र हस्तक्षेप भनी नेपाली जनताद्वारा विरोध गरिएको थियो । त्यो सन्दर्भमा भारतले अहिले अयोध्यामा राममन्दिर उद्घाटन गर्न लागेका बेला कपिलवस्तुको ती स्थानीय निकायले बिदाको घोषणा गर्नु राष्ट्रियतामाथि गम्भीर आँच पुर्याउनु हो र तिनीहरूको त्यस प्रकारको कार्यप्रति हामीले विरोध र भत्र्सना प्रकट गर्दछौँ । ती स्थानीय निकायको त्यस प्रकारको कार्यप्रति आÇनो दृष्टिकोण स्पष्ट गर्न हामीले सरकारसित माग गर्दछौँ ।
कपिलवस्तुका उक्त पालिकाबाहेक मधेसका कतिपय जिल्लाका पालिकामा पनि त्यो दिन बिदा दिने घोषणा गरिएका समाचार प्राप्त भएका छन् तर त्यसबारे आधिकारिक रूपले हामीलाई कुनै जानकारी प्राप्त नभएको हुनाले हामीले ती जिल्ला र पालिकाको नाम दिन सकेका छैनौँ तैपनि जहाँ भए पनि त्यस प्रकारको कुनै कार्यको हामीले विरोध गर्दछौँ र भत्र्सना पनि गर्दछौ । त्यस प्रकारका अराष्ट्रिय कार्यलाई रोक्न तथा त्यस प्रकारका कार्यका विरुद्ध कडा कदम उठाउन पनि हामीले सरकारसित माग गर्दछौँ । त्यसका साथै त्यस प्रकारका कार्यप्रति गम्भीर ध्यान हामीले देशका सम्पूर्ण जनताको ध्यान आकर्षित गर्न चाहन्छौँ ।”
