काठमाडौँ । बालबालिकाहरूलाई बिशिष्टकृत सेवा दिने एक मात्र सरकारी अस्पताल काठमाडौंको महाराजगन्जस्थित कान्ति बाल अस्पतालको ४० प्रतिशत बजेट काटिएको छ ।
आइतबार ६२ औँ वार्षिकोत्सव मनाउने क्रममा कान्ति बाल अस्पतालका कार्यकारी निर्देशक डा. पंकज रायले चालु आर्थिक वर्षमा सरकारले अस्पतालको बजेट ४० प्रतिशतले कटौति गरेपछि आर्थिक समस्या थपिएको बताए।
अस्पतालको कुल ३५२ शय्या मध्ये २४८ शय्या निशुल्क गरिएको डा. रायले जानकारी दिए। अस्पताल व्यवस्थापन समितिका अध्यक्ष डा. बाबुराम गौतमले अस्पतालको सेवा विस्तारमा सरकारले सहयोग गर्नु पर्ने बताए।
आइतबार एक समारोहको आयोजना गरी अस्पतालले ६२ औँ वार्षिक उत्सव मनाएको हो।
कार्यक्रममा बोल्दै योजना आयोगका सदस्य डा. आरपी विच्छाले कान्ति बाल अस्पताल अभिभावकविहीन जस्तो देखिएको बताए। उनले स्वास्थ्य मन्त्री बस्नेतलाई अभिभाभकत्व ग्रहण गरेर यसका विद्यमान समस्या समाधानका लागि अग्रसर भइदिन आग्रह गरे।
कान्ति बाल अस्पतालका पूर्व निर्देशक समेत रहेका डा. बिच्छाले बल्ल तल्ल ४५ शय्यामा चलिरहेको बाल सघन उपचार कक्षको क्षमता बढाएर १०० शय्याको बनाउनु आवश्यक रहेको बताए।
बाल सघन उपचार कक्षको अभावमा अहिले पनि देशका कुनाकुनाबाट उपचारका लागि कान्ति आउने बालबालिका बाहिर रिफर गर्नु परेको अवस्थाको तत्काल सम्बोधन हुनु पर्नेमा डा. बिच्छाको जोड थियो।
कार्यक्रममा प्रमुख अतिथि रहेका स्वास्थ्य तथा जनसंख्यामन्त्री मोहनबहादुर बस्नेतले ३५२ शय्या मार्फत उपचार सेवा प्रदान गरिरहेको कान्ति बाल अस्पतालको सेवा विस्तार गरि चाँडै १००० शय्याको बाल स्वास्थ्य अध्ययन संस्थान बनाइने आश्वासन दिए।
कार्यक्रममा मन्त्री बस्नेतले कान्ति बाल अस्पतालमा जडान गरिएको एमआरआई र सिटिस्क्यान सेवाको पनि उद्घाटन गरेका छन्। जापान सरकार र जापनिज सहयोग नियोगको सहयोगमा यी उपकरण जडान गरिएका हुन्।
त्यस अवसरमा जापान सरकारका प्रतिनिधि केनिचिरा हिजुकालाई सम्मान गरिएको थियो ।
