सन्देश पोखरेल, टोकियो ।
नागोयामा क्रिकेटलाई संस्थागत रूपमै अघि बढाउन सङ्गठित भएका क्रिकेटप्रेमी खेलाडीले गठन गरेका नेप्लिज क्रिकेट टिम नागोया (एनसिटी) ले एकदिवसीय क्रिकेट प्रतियोगिताको सम्पन्न गरेको छ ।
आयोजक टिम नेप्लिज क्रिकेट टिम नागोया (एनसिटी), गोर्खा क्रिकेट टिम नागोया र म्याग्निच्युड ११ (मिए) गरी ती टिमले भाग लिएको प्रतियोगितामा आयोजक टिमले जीत हासिल गरेको एनसिटीका सचिव अनिल अधिकारीले जानकारी दिए ।
प्रतियोगितालाई हौसला प्रदान गर्न मैदानमा पुगेका समापन समारोहका प्रमुख अतिथि एनआरएन आइसिसिका सचिव पारसमणि पोखरेलले क्रिकेट खेललाई नेपालीमाझ विकसित गर्दै लैजान एनआरएनलगायत अन्य सङ्घसंस्थासँग समन्वय गर्न आफूले भूमिका निर्वाह गर्ने भन्दै प्रतियोगितालाई आगामी दिनमा अझ भब्य बनाउन आफ्नो सहयोग रहने प्रतिबद्धता व्यक्त गरेका थिए ।
कार्यक्रममा विशेष अतिथि क्रिकेट खेललाई सपोर्ट गर्ने जापानिज नागरिक तोसिगी निसिगी रहेका थिए ।
क्रिकेट खेलबाट आगामी दिनमा अझ ठुलो र भव्य प्रतियोगता गर्न ऊर्जा मिलेको आयोजक एनसिटीका अध्यक्ष यम कँडेल ले बताए ।
१२ ओभरको लिग खेलमा एनसिटीले म्याग्निच्युडमाथि आठ ओभरमै सबै विकेट गुमाउँदै जित हासिल गरेको थियो भने दोस्रो खेल एनसिटी र गोरखा टिमबिच निर्धारित १२ ओभरको भएको थियो । त्यसमा टस जित्दै ब्याटिङ रोजेको गोरखा टिमले ११० रनको लक्ष्य दिएको थियो तर जवाफी ब्याटिङमा एनसिटीले सबै विकेट गुमाउँदै ६९ रन मात्र जोड्यो ।
त्यस्तै, तेस्रो खेल गोरखा र म्याग्निच्युड ११ बिच भएको थियो । गोरखाले दुई खेलमा जित हासिल गरेर र रनरेटको आधारमा एनसिटीबिच सम्पन्न फाइनल खेलमा गोरखालाई हराउँदै एनसिटीले जित हासिल गरेको थियो ।
प्रतियोगितामा कुल ८४ रन बनाएका एनसिटीका भूमिराज कँडेललाई म्यान अफ दि टुर्नामेन्ट घोषित गरिएको थियो ।
जापानस्थित नेपाली समुदायमाझ फुटबल, भलिवलका प्रतियोगिता भइरहेका छन । नेपालीको क्रिकेटप्रतिको लगाव भए पनि संस्थागत रूपमै क्रिकेट प्रतियोगिता भने कमै रूपमा भएका थिए ।
