काठमाडौं । मंगलबारदेखि देशव्यापीरुपमा लकडाउनको घोषणा भएपछि त्यसको असर पत्रिका प्रकाशनमा पनि परेको छ । केही दैनिक पत्रिका बाहेकका पत्रपत्रिका प्रकाशन र वितरणको काम रोकिएको छ ।
बुधबार प्रकाशित हुने राष्ट्रिय साप्ताहिक ‘युगदर्शन’ को प्रकाशन पनि तत्कालका लागि बन्द हुने भएको छ । पत्रिका प्रकाशन र वितरणमा समस्या भएपछि पत्रिका बन्द गर्नुपरेको युगदर्शन साप्ताहिकका व्यवस्थापक हरिकान्त शर्माले जानकारी दिनुभयो । शर्माका अनुसार अवस्था सहज भएपछि पत्रिकाको प्रकाशन पुनः सूचारु गरिनेछ ।
सरकारले सोमबारदेखि नै लामो दूरीको यातायात बन्द गर्ने निर्णय गरेपछि यसअघि नै कतिपय पत्रिका बन्द भएका थिए । तर छोटो दूरीको यातायात र आन्तरिक उडान सूचारु हुने भनिएकाले युगदर्शन साप्ताहिकले प्रकाशनको अन्तिम तयारी गरेको थियो । जनपक्षीय पत्रिका युगदर्शनको वितरण देशव्यापी रहेको छ ।
लकडाउनका कारण आज बिहानैदेखि राजधानी काठमाडौं लगायत मुख्य शहरहरु सुनसान छन् । एम्बुलेन्स, दमकल, ढुवानीका साधन तथा सुरक्षाकर्मी, सञ्चारकर्मीलगायतका सवारी साधन बाहेक सडकमा सवारी साधन गुडकेका छैनन् भने अत्यावश्यक सामाग्रीका पसलहरु जस्तै खाद्यान्न, औषधि, ग्यास र पेट्रोलियम पदार्थबाहेक पसलहरु पनि प्रायः ठप्प छन् ।
सरकारले आजदेखि एक हप्ता देशव्यापी रुपमा निषेधाज्ञा जारी गरेको छ । मानिसलाई अत्यावश्यक काम बाहेक घर बाहिर ननिस्कन भनिएको छ । हालसम्म देशभित्र एक जनालाई मात्रै देखिएको कोरोना भाइरसको संक्रमण नफैलियोस् भन्नका लागि अत्यन्त सावधानी अपनाउन सरकारले जनतासँग आह्वान गरेको छ ।
