काठमाडौँ । राष्ट्रिय जनमोर्चा र रक्तिम सांस्कृतिक अभियानद्वारा सञ्चालित प्रगतिशील देउसीभैलो अझै पनि कतिपय जिल्लामा जारी छ । यता, अर्घाखाँचीमा भने आगामी मङ्सिर ७ गतेसम्म देउसीभैलो चल्ने छ ।
पन्ध्रओटा जिल्लामा खेलिएको प्रगतिशील देउसीभैलो कार्यक्रम कैयौँ जिल्लामा आज मङ्सिर १ गते समापन हुँदै छन् भने कतिपय जिल्लामा अझै केही दिन चल्ने आयोजकहरूले जानकारी दिएका छन् ।
रुपन्देही
रुपन्देहीमा राजमो केन्द्रीय समितिको आयोजनमा चलिरहेको देउसीभैलो कार्यक्रमको कार्यतालिका मङ्सिर ४ गतेसम्म रहेको छ ।
वामपन्थी नेता चेतनाथ आचार्यका अनुसार रुपन्देहीमा भैलो कार्यक्रम मङ्सिर ४ गतेसम्म निश्चित गरिएको छ ।
‘आज मङ्सिर १ गते शुक्रबार कञ्चन र सैनामैना पालिकामा भैलो चलिरहेको छ’ उहाँले भन्नुभयो– ‘भोलि शनिबार भैलो टोली भैरहवामा पुग्ने छ । त्यहाँ राजमो केन्द्रीय सल्लाहकार तथा तराई मधेस जनवादी मोर्चाका अध्यक्ष बद्रे आलमको नेतृत्वमा प्रगतिशील देउसीभैलो खेलिने छ ।’
त्यहाँ रक्तिमका पूर्व कोषाध्यक्ष तेजेन्द्र थापाको नेतृत्वमा रक्तिमको टोली परिचालन भइरहेको छ ।
गुल्मी
गुल्मीमा राजमो जिल्ला समितिको आयोजनामा रक्तिमका कलाकारसहितको टोलीले भैलो खेलिरहेको छ ।
राजमो केन्द्रीय सदस्य तथा गुल्मी जिल्ला अध्यक्ष रामकुमार क्षेत्रीका अनुसार त्यहाँ मङ्सिर ३ गतेसम्म भैलो खेल्ने योजना रहेको छ ।
‘अहिलेसम्म कालिगण्डकी गाउँपालिकाका साविक खड्ककोट, पुर्तिघाट हुँदै आज मङ्सिर १ गते छापचौर इलाकामा हामी छौँ’ उहाँले भन्नुभयो– ‘अझै केही दिन हाम्रो टोली यतै देउसीभैलो खेल्ने छ ।’
उहाँले कालिगण्डकीपछि छत्रकोट गाउँपालिका र तमघास बजारमा देउसीभैलो कार्यक्रम पुर्याउनेबारे छलफल चलिरहेको जानकारी पनि दिनुभयो ।
अर्घाखाँची
अर्घाखाँचीमा भूमिकास्थान र मालारानीका पालिकास्तरीय प्रगतिशील देउसीभैलो कार्यक्रम समापन भएको छ तर आगामी मङ्सिर ५ गतेदेखि ७ गतेसम्म सदरमुकाम सन्धिखर्कमा भैलो खेल्ने तयारी चलिरहेको छ ।
युगदर्शन संवाददाता वशन्त खड्काका अनुसार एकादशीको अवसर पारेर सन्धिखर्कमा तीन दिनसम्म भैलो खेल्ने गरिन्छ ।
उहाँका अनुसार राजमो अर्घाखाँचीको नेतृत्वमा रक्तिमका कलाकारसहित सन्धिखर्कमा तीन दिनसम्म भैलो खेलिने छ । यतिखेर राजमो र रक्तिमका जिल्ला समितिले त्यसको तयारी गरिरहेका छन् ।
प्युठान
प्युठानको स्वर्गद्वारी नगरपालिकामा पनि अझै केही दिनसम्म प्रगतिशील देउसीभैलो चल्ने भएको छ ।
राजमो लुम्बिनी प्रदेश अध्यक्ष बोमबहादुर खत्रीका अनुसार त्यहाँ अझै दुई दिन बढी भैलो चल्ने भएको हो ।
त्यस्तै, मल्लरानी गाउँपालिकामा भने आज भैलो समापन हुने कार्यक्रम रहेको छ ।
दाङ
दाङमा राजमोका पालिकास्तरीय भैलो कार्यक्रममध्ये घोराहीमा भोलि मङ्सिर २ गते शनिबार समापन हुँदै छ ।
जिल्ला अध्यक्ष गणेश आचार्यका अनुसार घोराहीमा भोलि भैलो समापन हुने भएको हो ।
‘घोराहीमा राजमो पालिकाको आयोजना चलिरहेको भैलो कार्यक्रम मङ्सिर २ गते समापन हुँदै छ’ उहाँले भन्नुभयो– ‘तुलसीपुर, गढवा र राप्ती गाउँपालिकामा भने भैलो कार्यक्रम समापन भइसकेको छ ।’
बागलुङ र चितवनमा आज समापन हुँदै
बागलुङ र चितवन जिल्लामा भने आज भैलो कार्यक्रमको समापन हुँदै छ ।
चितवनबाट राजमो केन्द्रीय सदस्य डम्मर पुरीका अनुसार त्यहाँ भरतपुर पालिकाको वडा नम्बर १२ मा रक्तिमको सांस्कृतिक प्रस्तुतिसहित
आज मङ्सिर १ गते शुक्रबार भैलो समापन हुँद छ ।
यता बागलुङमा निसिखोला, बडीगाड र जैमिनीमा पनि आजै भैलो समापन हुँदै छ ।
बागलुङ जिल्ला समन्वय समितिको प्रमुखसमेत रहनुभएका राजमो नेता अमर थापाका अनुसार अन्यत्रको भैलो समापन भइसकेको छ भने निसिखोला, बडिगाड र जैमिनी पालिकाका भैलो आज समापन हुँदै छन् ।
यसअघि काठमाडौँमा कात्तिक २९ गते भैलो समापन भइसकेको छ भने कपिलवस्तु र नवलपुरमा कात्तिक ३० गते भैलो कार्यक्रम समापन भइसकेको छ ।
त्यसैगरी, बारा, नवलपरासी, पर्वत, सुर्खेतलगायतका जिल्लामा यसअघि नै भैलो समापन भइसकेका छन् ।
