काठमाडौं । नेपाली सेनाले सामाजिक सञ्जालमा हेलकप्टरमार्फत किटनाशक औषधि छर्ने अफवाह फैलाइएको भन्दै त्यसमा कुनै सत्यता नरहेको स्पष्ट पारेको छ ।

विभिन्न व्यक्तिले सामाजिक सञ्जाल तथा सञ्चारमाध्यम मार्फत कोरोना नियन्त्रणका लागि सेनाले राति १२ बजे काठमाडौंमा किटनाशक औषधि छर्कदैं छ भन्ने भ्रम फैलाइएपछि सेनाले विज्ञप्तिमार्फत त्यसको खण्डन गरेको हो ।

जंगी अड्डाले शनिबार जारी गरेको विज्ञप्तिमा ‘नेपाली सेनाले केलिकप्टर प्रयोग गरी किटनाशक विषादी छाड्ने कुनै योजना नरहेको’ स्पष्ट पारेको छ । साथै सेनाले कोरोना भाइरसको उच्च जोखिमबाट बचाउ तथा रोकथामका लागि उपलब्ध सबै उपायहरु अबलम्बन गर्न प्रतिवद्ध रहेको समेत विज्ञप्तिमार्फत जनाएको छ।