माधव खनाल, प्युठान ।
कोरोना भाइरस संक्रमणको आशंकामा प्युठानको ऐरावती गाउँपालिकाका शैक्षिक संस्था आजदेखि अनिश्चित कालका लागि बन्द गरिएको छ । चल्दै गरेको वार्षिक परीक्षा पनि स्थगित भएको छ ।
कोरोना भाइरस डिजिज (कोभिड–१९) को लक्षणसँग मेल खाने लक्षण भएका एक बिरामी भारतको नयाँदिल्लीबाट प्यूठान आएसँगै कोरोना संक्रमणको आशंकामा गाउँपालिकाले शैक्षिक संस्था बन्द गरेको हो । ऐरावती गाउँपालिका– नेपानेका चैते दमाइका छोरा काले दमाइ मंगलबारसाँझ नेपाने आइपुगेका हुन्।
बिरामी प्यूठान प्रवेश गरेको सूचना लगत्तै जिल्ला प्रसासन कार्यालयले निजलाई क्वारेन्टाइनमा राख्ने उद्देश्यले एम्बुलेन्स पठाए पनि उनी भागेकाले उद्दारमा कठिनाइ भएको थियो । बुधबार ऐरावती २ का वडा अध्यक्ष भिमेश कुमार घर्तीमगर लगाएत गाउँलेहरुले सम्झाए पछि सपरिवार चेकजाँचका लागि जिल्ला अस्पताल विजुवार पठाइएको थियो ।
बिरामीले प्यूठान प्रवेश गरेपछि केही नजिकका आफन्तसँग मर्नै परे आफ्नै ठाउँमा मर्छु भनेका कारण पनि निजलाई कोरोना संक्रमण हुन सक्ने स्थानीयले आशंका गरेका छन् ।
