भरतपुर । चितवनस्थित विपी कोइराला मेमोरियल क्यान्सर अस्पतालमा क्यान्सरका बिरामीलाई पालो कुर्ननपर्ने बनाइने दाबी गरिएको छ ।
अस्पतालका नवनियुक्त कार्यकारी निर्देशक डा शिवजी पौडेलले अस्पतालमा आउने बिरामीलाई पालो कुर्नुपर्ने समस्याको अन्त्य हुने गरी काम गर्ने बताउनुभएको हो ।
सञ्चारकर्मीसँग कुरा गर्दै उहाँले अस्पतालमा विभिन्न सेवा लिँदा महिनौँ पालो कुर्नुपर्ने गुनासोको अन्त्य हुने बताउनुभयो ।
रेडियो थेरापी (सेकाइ) गराउनुपर्दा पाँच महिनासम्म पालो कुर्नुपरेको गुनासो आउने गरेका छन् ।
पौडेलले भन्नुभयो– ‘अहिले दुई हप्ताभन्दा बढी रेडियोथेरापीमा पालो छैन । कतैबाट गलत सूचना गएर पाँच महिना लाग्छ भन्ने छ भने मलाई भेट्नु होस् म यसलाई न्यूनीकरण गर्ने छु ।’
अहिले कुर्नुपरेको पालोको समय अन्त्य गरेर आजको आजै सेवा दिने गरी काम गर्ने बताउनुभयो ।
अस्पतालमा सिटी, एमआरआइलगायतको सेवामा केही जनशक्ति अभावका कारण ढिलाइ हुने गरेको भन्दै उहाँले छिट्टै जनशक्तिको व्यवस्थापन गरेर पालो कुर्नुनपर्ने बनाइने बताउनुभयो ।
उहाँले भन्नुभयो– ‘आएकै दिन सिटिस्क्यान गरेर भोलि पल्ट रिपोर्ट दिने बनाउनका लागि अगाडि बढेको छु ।’
बिरामी अस्पतालमा छिर्दै गर्दा गेटैबाट सुधार गर्नुपर्छ भनेर बडापत्र, बिरामीलाई सूचना दिन सूचनापाटी, बिरामीका गुनासा सुन्न छओटा सुझावपेटिका व्यवस्था गरिसकेको उहाँले बताउनुभयो ।
उहाँले भन्नुभयो– ‘सुझावपेटिकामा अघिल्लो दिन परेका गुनासा भोलिपल्ट नै खोलेर हेर्ने र त्यहाँ के गुनासा छन् ? तत्काल समाधान गर्ने बाटोतर्फ हामी अघि बढेका छौँ ।’
विगत चार महिनामा अस्पतालमा नेतृत्व खाली रहँदै गर्दा विधिवत् रूपमा दैनिक क्रियाकलापमा केही अप्ठेरो परेको भन्दै उहाँले नेतृत्व चयन भएसँगै औषधि, उपकरणलगायतका बोलपत्र आह्वान गरेर काम अगाडि बढाइएको जानकारी दिनुभयो ।
क्यान्सर अस्पताललाई सुधार गर्नकै लागि आफू नेतृत्वमा आएको भन्दै उहाँले भन्नुभयो– ‘सुरुमा म क्यान्सर अस्पताललाई अपडेट गर्छु, स्वास्थ्यसेवाका पाटालाई विशेष ग्राह्यता दिएर भएका न्यूनतम गुणस्तर पूर्ण भइसकेपछि अस्पताललाई स्तरोन्नति गर्नेतर्फ म लाग्ने छु ।’
क्यान्सर अस्पताल र क्यान्सरको राष्ट्रिय रेफरल सेन्टर भएर पनि बोनम्यारो ट्रान्सप्लान्ट (प्रत्यारोपण) को सेवा यहाँ नभएको भन्दै कार्यकारी निर्देशक डा पौडेलले भन्नुभयो– ‘हामीले डेढदुई वर्षभित्र यो अस्पतालमा बोनम्यारो प्रत्यारोपण हुने गरी काम गर्छाैं ।’
पेटस्क्यान मेसिन खरिदको प्रक्रिया यसै वर्ष हुने उहाँको भनाइ छ ।
उहाँले थप्नुभयो– ‘यहाँ आएका बिरामीको उपचार सहज, सुलभ हुनुपर्छ, अस्पतालभित्रै हुनुपर्छ भन्ने नै मेरो उद्देश्य हो ।’
आफू निजी अस्पतालमा काम नगर्ने भएकाले अधिकांश समय अस्पतालको विकासमा जुट्ने उहाँले बताउनुभयो ।
चार महिनापछि अस्पतालले कार्यकारी निर्देशक पाएको हो । लामो समय कार्यकारी पद खाली हुँदा अस्पतालका सेवा प्रभावित भएका थिए । (रासस)
