पोखरा । पशुपन्छीको उपचारमा स्तरीय सेवा दिन गण्डकी प्रदेशको कास्की र तनहुँमा नमुना पशुपन्छी अस्पताल भवन निर्माण भइरहेको छ ।

गण्डकी प्रदेश सरकारको लगानीमा निर्माणाधीन अस्पताल भवनको भौतिक निर्माण यसै वर्षभित्र सक्ने लक्ष्य लिइएको छ ।

कास्कीको पोखरा–१२ माटेपानी र तनहुँको दमौलीमा प्रदेशस्तरीय नमुना पशुपन्छी अस्पताल बन्न लागेको कृषि तथा भूमि व्यवस्था मन्त्रालयले जनाएको छ । पशुपन्छीमा लाग्ने रोगको निदान र उपचारका लागि आधुनिक पूर्वाधारसहितको अस्पताल निर्माण हुने मन्त्रालयको योजना तथा अनुगमन महाशाखा प्रमुख डा गृष्म न्यौपानेले बताउनुभयो ।

‘अहिले भइरहेका भवन अस्पतालको संरचनाअनुरूप छैनन् । त्यसले सेवाप्रवाहमा पनि जटिलता निम्त्याइरहेको छ’ उहाँले भन्नुभयो– ‘पशुपन्छीको उपचारमा आवश्यक पूर्वाधारसहितका अस्पताल भवन बन्दै छन् । अस्पतालले दिने सेवा पनि सोहीअनुसार विस्तार हुँदै जान्छ ।’

मन्त्रालयका अनुसार कास्कीमा निर्माण भइरहेको अस्पताल निर्माणमा रु पाँच करोड ५४ लाख ४८ हजार र तनहुँको अस्पताल निर्माणमा रु पाँच करोड ५४ लाख ६५ हजार लागत लाग्ने छ । कास्कीमा निर्माणाधीन अस्पतालका गत आर्थिक वर्षमा रु तीन करोड २५ लाख विनियोजन गरिएकामा रु दुई करोड ३२ लाख ९७ हजार खर्च भएको छ । तनहुँको अस्पताल भवनका लागि गत आवमा रु तीन करोड ५० लाख बजेट विनियोजन भएकामा जम्मा रु ६० लाख २७ हजार खर्च भएको मन्त्रालयले जनाएको छ । कास्की अस्पताल भवनमा हालसम्म रु चार करोड ९६ लाख ९५ हजार र तनहुँमा रु तीन करोड ४० लाख ८२ हजार खर्च भइसकेको छ ।

कास्कीमा आगामी कात्तिक १० गतेसम्म र तनहुँमा आउँदो पुस ११ गतेसम्म निर्माण सक्ने गरी म्याद थप भएको महाशाखा प्रमुख डा न्यौपानले बताउनुभयो । भवन बनेपछि आवश्यक पूर्वाधार र जनशक्ति व्यवस्थापन गरेर अस्पतालको सेवा सुरु गरिने कास्कीस्थित भेटेरिनरी अस्पताल तथा पशु सेवा विज्ञ केन्दका प्रमुख शम्भुराज पाण्डेले बताउनुभयो ।

‘एक्सरे, भिडियो एक्सरे, प्रयोगशाला, शल्यक्रिया, दुध परीक्षणलगायत पशुपन्छीको उपचारमा स्तरीय सेवा दिने गरी नमुना अस्पताल बनाउन लागिएको हो’ उहाँले भन्नुभयो– ‘स्वास्थ्य पूर्वाधार, उपकरणदेखि जनशक्तिसम्मको व्यवस्थापन सोहीअनुसार गर्न लागिएको छ ।’

नमुना अस्पताल बनेपछि पशुपन्छीमा देखिने जटिल प्रकृतिका रोगको निदान र प्रयोगशाला परीक्षणका लागि बाहिर जानुपर्ने अवस्थाको अन्त्य हुने केन्द्रका प्रमुख पाण्डेले उल्लेख गर्नुभयो ।

‘अत्याधुनिक प्रविधि र उपकरण नहुँदा कुनै बेला अनुमानका भरमा पनि उपचार गर्नुपर्ने अवस्था थियो । अब पशुपन्छीको उपचार पद्धतिमा पनि गुणात्मक परिवर्तन ल्याउने गरी अस्पतालको पूर्वाधार बन्दै छ’ उहाँले भन्नुभयो– ‘पशुपन्छीमा बेला बेला फैलने गरेको महामारीजन्य रोगको उपचार, नियन्त्रण र रोकथामका लागि पनि यो अस्पतालबाट ठूलो टेवा पुग्छ ।’

अहिले कास्कीको भेटेरिनरी अस्पताल तथा पशु विज्ञ केन्द्रमा दुई जना मात्र पशु चिकित्सकको दरबन्दी छ । नमुना अस्पताल बनेपछि विशेषज्ञसहितको जनशक्ति थप्नुपर्ने अवस्था रहेको केन्द्रले जनाएको छ । (रासस)