काठमाडौँ । ढाडको बाङ्गोपनाको उपचार गरिरहेका स्पाइन सर्जनहरू काठमाडौँमा भेला भएका छन् ।
ढाडको बाङ्गोपनाको उपचार पद्धति, नवीनतम प्रविधि, आगामी रणनीतिबारे छलफल गर्न चिकित्सकहरू काठमाडौँमा भेला भएका हुन् ।
एसोसिएसन अफ स्पाइन सर्जन अफ नेपालले गरेको कार्यशालामा देशभरबाट ८० बढी चिकित्सक भेला भएका थिए ।
ग्रान्डी अन्तर्राष्ट्रिय अस्पतालका मेडिकल डाइरेक्टरसमेत रहेका एसोसिएसन अफ स्पाइन सर्जन अफ नेपालका अध्यक्ष डा. विनोद बिजुक्छेले नेपालमा ढाडको बाङ्गोपना उपचार सेवा उत्कृष्ट भएको जानकारी दिने उद्देश्यले कार्यशाला आयोजना गरिएको बताए ।
ढाड बाङ्गिँने समस्या १६ वर्षमुनिका बच्चामा देखिने विभिन्न अध्ययनले देखाएको छ । कुल जनसङ्ख्याको ०.५ प्रतिशतमा अलिकति ढाड बाँगिन्छ तर बाङ्गिँने पनि २० डिग्रीभन्दा माथिको ढाड बाङ्गिँएको छ भने त्यसले समस्या दिने चिकित्सकहरूले बताउँदै आएका छन् ।
ढाड बाङ्गिँने समस्या छोराभन्दा छोरीलाई बढी देखिने पनि अध्ययनले देखाएको डा. बिजुक्छेले बताए । धेरैजसो १० वर्षको उमेर गइसकेपछि बालिकालाई देखिने गरेको छ ।
ढाडको बाङ्गोपनाको समस्या सात महिला बराबर एक पुरुषमा देखिन्छ । उनले अस्पतालबाट ढाडको बाङ्गोपनाको उपचार नेपालमा सर्वसुलभ रहेको र सफल उपचार हुँदै आएको बताए ।
बिजुक्छेले कार्यशालामा अब आउने पुस्तालाई ढाडको बाङ्गोपना उपचार कसरी गर्ने ? उपचार पद्धति के के छन् भन्ने विषयमा छलफल भएको बताए ।
नेपाल स्वास्थ्य अनुसन्धान परिषद्का उपाध्यक्षसमेत रहेका हाडजोर्नी तथा मेरुदण्ड रोग विशेषज्ञ डा. गौरवराज ढकालले ढाडको ढाड बाङ्गिँने रोग धेरैजसो बालिकामा देखिने गरेको बताए ।
उनले धेरैजसो १६ वर्षमुनिका बालिकामा ढाड बाङ्गिँने रोग देखिने भन्दै रोकथामका लागि उपचारको उपाय अपनाई सतर्क गराउँदै आएको बताए ।
ढाडको बाङ्गोपनाको उपचार समयमा गरिएन भने फोक्सो र मुटुमा समस्या आउन सक्ने चिकित्सकहरू बताउँछन् ।
