पोखरा । पोखरामा जारी नेपाल भारत द्विपक्षीय टी २० दृष्टिविहीन महिला क्रिकेटको दोस्रो खेलमा नेपालले हार व्यहोरेको छ।
१७३ रनको लक्ष्य पाएको भारतले १४.३ ओभरमा १ विकेटको क्षतिमा ९ विकेटले जित पूरा गर्यो। भारतका लागि पुला र सिमु दासले उत्कृष्ट इनिङ खेलिन्। बी ३ दृष्टिविहीन पुलाले ६५ रन जोडिन्। बी १ दृष्टिविहीन सिमुले ६६ रनको योगदान दिइन्। बी २ गंगौभाले २२ रन जोडिन्। उनी रन आउट भएकी थिइन्।
दृष्टिविहीन खेलाडीहरुले क्रिकेट बलमा रहेको ध्वनीको सहायताबाट खेल्छन्। क्रिकेट टोलीमा रहेका दृष्टिविहीन खेलाडीलाई ३ वटा समूहमा विभाजन गरिएको छ। जसमा बी १ खेलाडी अर्थात् पूर्ण दृष्टिविहीन, बी २ (मध्यम दृष्टि) र बी ३ (न्यून दृष्टि) भएका खेलाडी हुन्।
यसअघि पोखरा क्रिकेट मैदानमा टस हारेर ब्याटिङको निम्तो पाएको नेपालले २० ओभरमा ३ विकेटको क्षतिमा १७२ रनको योगफल तयार पारेको थियो।
यसअघि हिजो भएको प्रतियोगितामा नेपालकी विनिता पुनले पहिलो पटक शतक प्रहार गरेकी थिइन्। भारतविरुद्ध शतक प्रहार गर्दै उनी शतक प्रहार गर्ने विश्वकै पहिलो दृष्टिविहीन महिला खेलाडी बनेकी हुन्।
उनको शतकीय इनिङ्समा नेपालले भारतमाथि ८ विकेटको जित हासिल गरेको छ। १७४ रनका विजयी लक्ष्य पाएको नेपालले १७.४ ओभरमा २ विकेट गुमाउँदै लक्ष्य पूरा गरेको थियो।
